Светиот Отец се сретна со учесниците на курсот за правници организиран од судот на Римската Рота, при што ја истакна важната поврзаност помеѓу пасторалот и канонското право
Поздравувајќи ги учесниците на курсот за правници организиран од судот на Римската Рота, папата Фрањо потсети на односот меѓу евангелизациското послание на Црквата и црковното право.
Во својот говор во сабота 18 февруари 2023 година, Папата истакна дека канонското право не може да постои без евангелизација, а евангелизацијата не може да се спроведува без канонско право, бидејќи јадрото на канонското право е поврзано со добрата на заедништво, посебно со Словото Божјо и со Светите Тајни.
Секој човек и заедница, додаде Папата, има право да се сретне со Христос, а сите норми и правни акти се насочени кон унапредување на автентичноста и плодноста на таа средба.
Црковното право, значи, е тесно поврзано со животот на Црквата, како еден од нејзините неопходни аспекти, а тоа е праведност во зачувувањето и предавањето на добрата на спасението.
Законот е услов на љубовта
Папата Фрањо потоа ги повика учесниците на курсот за правници да го сакаат канонското право, бидејќи правото е услов за љубовта, според зборовите на починатиот папа Бенедикт XVI.
Иако канонистите првенствено работат во согласност со нормите, судењата и санкциите, тие се повикани никогаш да не ги заборават правата на луѓето и затоа мора да ги стават луѓето во центарот на нивната работа.
Тие права никогаш не се произволни изговори, туку објективни добра насочени кон спасение, кои мора да се препознаат и заштитат, притоа не заборавајќи да ги почитуваат природните добра својствени на црковната заедница. Со други зборови, рече Папата, канонските правници мора да ја нагласат вистината на правдата во животот на одредени Цркви, што е задача која многу придонесува за евангелизацијата.
Канонистите, продолжи Папата, се повикани да го согледаат конкретното добро додека се занимаваат со секој поединечен случај, без да го занемарат општото добро својствено на законот.
Синодалниот од во канонското право
Папата потоа размислуваше за врската помеѓу канонското право и синодалноста на Црквата. Синодалниот дух треба да живее во секој аспект од вашите законски должности, рече Папата. Заедничкото патување со заемно слушање додека се повикуваме на Светиот Дух е неопходен услов за праведност.
Римскиот бискуп ги повика присутните секогаш во дух на понизност да бараат мислење од поискусните колеги за да научат како подобро да и служат на Црквата.
Судови и пасторал со семејства
Папата Фрањо се осврна и на поврзаноста на пасторалната грижа за семејствата и црковните судови.
Целосната пасторална грижа на семејства не може да ги игнорира правните прашања поврзани со бракот, рече Светиот Отец.
Канонистите никогаш не смеат да заборават да се занимаваат со прашања со важен пасторален елемент – рече Папата.
Барањата за вистина, достапност и претпазлива брзина мора секогаш да ја водат вашата работа, рече папата Фрањо и не смееме да ја занемариме должноста да направиме се што е можно за да ги помириме паровите или да ја зајакнеме нивната заедница.
Зрак на правдата
На крајот, папата Фрањо ги поттикна присутните да продолжат да ја истражуваат вистинската добрина во Божјото Слово.
Светиот Отец ги довери на Пресвета Богородица, огледалото на правдата.
Ватикан њуз/к.мк
