Папата Фрањо на 18 мај 2024 година го посети затворот Монторио во Верона, повикувајќи ги затворениците „да разговараат со Бог за својата болка и едни на други да си помагаат за да можат да ја поднесат“.
Најдолгата средба за време на еднодневната посета на папата Фрањо на Верона беше неговата средба во градскиот затвор Монторио. Голем број затвореници и персонал се собраа на спортскиот терен на установата за да го поздрават Папата. По говорите на директорката на затворот Франческа Џојени и младиот затвореник Дуарте, на присутните Папата им се обрати накратко.
Затворот како место на хуманост
„За мене влегувањето во затвор е секогаш важен момент затоа што затворот е место на голема хуманост“, рече Папата, истакнувајќи дека во затворот човечноста е „искушувана, а понекогаш и оптоварена со тешкотии, вина, осуда, недоразбирање и страдање“. Меѓутоа, во исто време, затворот е место „полно со сила, желба за прошка и волја за откупување“, рече Папата.
Папата потоа додаде дека со голема тага ја примил веста дека некои затвореници неодамна извршиле самоубиство. „Ова е тажен и ужасен чин кој може да доведе само до неподнослив очај и болка. Постоењето, рече Папата, е „уникатен дар“ за нас самите и за другите и „пред се за Бога кој никогаш не не напушта и кој навистина знае да слуша, да се радува и да плаче заедно со нас“. Да разговараме со Бога за нашата болка и да си помагаме меѓусебно да ја поднесеме како сопатници, поттикна Папата.
Божјо татковство
Во својот поздравен говор, директорката на затворот истакна дека затворениците доаѓаат од 40 различни земји и различна верска позадина. „Господ е еден“, им рече Папата на затворениците. „Нашите култури не научија да го нарекуваме со различни имиња и да го наоѓаме на различни начини, но Тој е истиот Отец на сите нас.
„Тој е еден“, продолжи Папата, „и сите религии, сите култури на различни начини гледаат на единствениот Бог. Тој никогаш не не остава. Со него покрај нас можеме да го надминеме очајот и да го живееме секој момент како вистинско време за почеток“, рече меѓу другото папата Фрањо, кој по средбата ручаше со затворениците.
Ватикан њуз/к.мк
