Во светилиштето каде што се чува ликот на „Ла Моренета“, Папата се присети на годините поминати во Перу како ректор на парохијата посветена на неа. По молитвата на Бројаницата, тој потсети дека Исус „го разоткрива насилството што може да се скрие во нашите зборови и ставови“ и нè повика да го оставиме настрана оклопот што ги стврднува нашите срца: „Да се облечеме само во оружјето Божјо“.
„Среќен сум што можам да дојдам во подножјето на Ла Моренета, за да ѝ го доверам, со полно доверие во нејзиното мајчинско застапништво, моето Петрово служење и мисијата на Црквата во светот, кој вика барајќи правда и мир.“
Ѕвоната бијат напладне, а нивното ехо се шири низ долината, опкружена со планини што изгледаат како скаменет песочен замок. На вториот ден од каталонската етапа од своето апостолско патување, папата Лав XIV пристигна во едно од најзначајните духовни места во Шпанија.
Сместено на повеќе од 700 метри надморска височина, светилиштето Монтсерат и соседниот манастир чуваат древна побожност, како и приказни за жртва, надеж и мачеништво.
Папамобилот се движеше по кривулестите патишта, додека верниците го поздравуваа Папата и во внатрешноста и надвор од светилиштето. Небесните гласови на детскиот хор од најстарата „Есколанија“ во Европа, во присуство на околу илјада луѓе, го поздравија наследникот на Петар, обвиткувајќи ја неговата молитва во свеченост и нежност. Благодарноста на Папата најпрво беше упатена токму кон нив.
Црква што сака да биде гостопримлива и мисионерска
Свети Игнатиј Лојолски, основачот на Дружбата Исусова, токму тука ги нашол условите да го положи својот витешки оклоп и да ја започне својата мисија во служба на Бога. Папата Лав се присети на тоа, нагласувајќи дека Исус ни го покажува патот на милосрдието, помирувањето, вистината и кротоста.
Епископот Ксабиер Гомез ОП, епископ на Сант Фелиу де Љобрегат, го пречека Папата во оваа локална Црква, која, како што рече, се стреми да биде гостопримлива и мисионерска, будејќи во секого желба за Бога.
Присуството на папата Лав XIV го означи завршувањето на илјадагодишнината на ова светилиште. Тоа е место кое, како што потсети отец игумен Манел Гаш и Хуриос, му помага на човекот повторно да се открие себеси и „придонесува за изградба на свет на мир“.
Токму овој копнеж по мир го носи Папата и овде, меѓу планините со заоблени врвови, каде што денес се собраа семејства со мали деца, стари лица и луѓе во инвалидски колички. Искачувањето до светилиштето за многумина беше вистински аскетски чин, а денес, повеќе од кога било, се совпадна со повикот од мотото на патувањето: „Подигни го погледот“.
„Да се облечеме само во оружјето Божјо“
Во Монтсерат, погледот природно се издигнува кон величественоста на природата и готскиот манастир, кон литургијата и хармонијата. А опомената на Папата беше секој да придонесе за создавање хармонија во светот, кој постојано е нарушуван од судирот на оружја што разделуваат цели народи.
„Исус го разоткрива насилството што може да биде скриено во нашите зборови и ставови: критиката што понижува, осудата што уништува и агресијата што разделува. Ова скриено насилство често може да биде облечено во привиден оклоп, со кој се обидуваме да ги заштитиме нашите рани, нашите стравови или страдањето предизвикано од неправдата. Да ги подигнеме очите кон Марија и да ја молиме да ни помогне да се облечеме само во оружјето Божјо“, рече Папата.
Да го положиме оклопот што го стврднува срцето
Како што направи и претходната вечер на бдението со младите на стадионот во Барселона, Папата и во Монтсерат повторно повика да ги оставиме маските што ги носиме секој ден.
Неговата порака останува дека секој човек е повикан да се покаже без филтри и маски, во својата автентичност, бидејќи токму тоа е основата врз која се градат односи на меѓусебна доверба и општо добро.
„Денес пред нејзините нозе го положуваме оклопот што постепено ги стврднуваше нашите срца“, рече папата Лав XIV.
„Заедништвото нека биде посилно од секоја поделба“
Ликот на Богородица од Монтсерат, позната како Ла Моренета, ја прикажува Богородица востоличена со Детето Исус во скутот, а во десната рака држи сфера што го претставува светот. Таа е симбол на „невооружената и разоружувачка сила на љубовта“, како и на мајчинската грижа што Марија ја има за човештвото.
Папата Лав призна дека Ла Моренета му е особено драга, бидејќи го потсетува на годините што ги поминал во Трухиљо, Перу, како ректор на парохијата посветена на Санта Марија де Монтсерат.
„Ла Моренета секогаш ми правеше друштво. Ти благодарам, Каталонија, за твојата вера“, рече Папата на каталонски јазик.
Папата ги повика верниците да погледнат кон ова јадро на љубовта и да ја негуваат желбата истата таа љубов да ја излеат врз ранетото, разочарано и изморено човештво.
„Таа нè повикува да се препознаеме едни со други како браќа и сестри, за никој да не биде исклучен и заедништвото да биде посилно од секоја поделба“, рече папата Лав.
Нека омразата отстапи место на надежта и мирот
Завршната молитва на Римскиот епископ беше вистинска катехеза за тоа како верата во Христос треба да се воплотува во секојдневниот живот, во различни средини и харизми.
„Да ја молиме Марија, Царицата на мирот, да нè научи да се откажеме од навредливи зборови, избрзани осуди, клевети и озборувања. Да научиме да ја чуваме и негуваме љубовта во нашите семејства, меѓу пријателите, на работното место, на социјалните мрежи, во политичките дискусии и во христијанските заедници, за омразата да отстапи место на надежта и мирот“, рече Папата.
Поздрав од балконот: верата дава живот и надеж
Последните зборови на папата Лав XIV во Монтсерат беа упатени од балконот на светилиштето на Ла Моренета до повеќе од 7.000 луѓе собрани на плоштадот. Тие ја следеа молитвата на Бројаницата со Папата и неговото обраќање преку големите екрани.
„Ви благодарам на секој од вас што сте тука утрово, за да ги потсетите сите, во Каталонија, во Шпанија и низ целиот свет, дека верата дава живот и верата дава надеж. Токму Марија, која Исус ни ја даде како Мајка од крстот, нè придружува. Таа е израз на мајчинската љубов што секогаш ќе нè придружува. Сите сме обединети во едно семејство, прифатени од нашата Мајка Марија, Богородица од Монтсерат“, рече Папата.
Папата им се заблагодари на сите присутни за „прекрасното сведоштво на верата“.
„Радоста, ентузијазмот и длабокото чувство на вера што ги доживуваме овие денови — најпрво во Мадрид, сега во Барселона и Каталонија, а потоа и на Канарските Острови — покажуваат дека цела Шпанија е исполнета со вера, љубов и желба да Го слави Бога, да Му благодари и да биде обединета. Благодарност до Каталонија што им посакува добредојде на толку многу луѓе од други земји, бидејќи нè учи како сите да ги интегрираме во едно семејство“, рече папата Лав XIV.
Ватикан њуз/к.мк
