Конгрегацијата за институти со посветен живот и општества со апостолски живот, заедно со Папскиот совет за култура, во мај ќе организира конференција за иднината на културното наследство на монашките заедници на тема „Харизма и креативност“.
Каталогизацијата, управувањето и иновациите на културното наследство на монашките заедници ќе бидат во фокусот на меѓународната конференција што ќе се одржи во Рим од 4 до 5 мај. На тема „Харизма и креативност“, целта е да се зајакне мрежата и да се разменат најдобрите практики за подобрување на капацитетите на монашките заедници да го зачуваат и развиваат своето наследство на креативен начин.
Тоа е плод на зголемената свест за фактот дека културното наследство на Црквата е дел од културниот идентитет на локалните заедници и може да биде ново средство за промовирање на пасторални и мисионерски цели.
Дводневната конференција е организирана заедно со Националната канцеларија за црковно културно наследство и верски објекти на Италијанската бискупска конференција, Факултетот за историја и културно наследство на Папскиот универзитет Грегоријана, Одделот за архитектура на Универзитетот во Болоња и во соработка со Меѓународната унија на генералните монашки поглавари и Унијата на генерални монашки поглаварки, како и Секретаријатот за помош на монахињите.
Собирот беше претставен на прес-конференција во Канцеларијата за печат на Светиот Престол, каде што главни говорници беа кардиналот Жоао Браз де Авиз, префект на Конгрегацијата за институти со посветен живот и општества со апостолски живот и кардинал Џанфранко Раваси, претседател на Папскиот совет за култура.
И двајцата ја истакнаа важната улога на монашките заедници, кои се повикани да ја исполнат одговорноста на Црквата внимателно да управуваат со нивното културно наследство во светлината на нивното евангелско послание и посебна грижа за сиромашните.
Оваа задача денес е многу итна, бидејќи монашките заедници се соочуваат со опаѓање на бројот на звања, што доведува до поголем ризик од напуштање и распаѓање на нивното огромно културно наследство. Посветените мажи и жени се повикани да размислуваат заедно за вредноста на нивниот имот во денешното општество, нивната крајна цел и нивната интимна поврзаност со харизмата на нивниот монашки ред и со пророчката димензија на нивната харизма, рече кардиналот Браз де Авиз.
Учесниците на конференцијата ќе имаат можност да разменат мислења и искуства за овие предизвици и да дискутираат за нови стратегии за промовирање на интегрирано и на крајот поефективно управување со културното наследство на Црквата.
Пред почетокот на конференцијата, организаторите собраа голем број истражувања, проекти и добри практики во оваа област. Придонесот, главно од Европа, беше собран во четири теми кои ќе бидат во фокусот на конференцијата: рамки за теоретско разбирање, каталогизација, управување и повторна употреба. Покрај тоа до монашките заедници беше испратен и прашалник.
Ватикан њуз/к.мк
