Бискуп Стојанов по повод празникот Марија вознесена на небо – Голема Богородица ја предводеше Понтификалната света Миса во Катедралата „Пресвето Срце Исусово“ во Скопје. Со бискупот Стојанов сослужуваа катедралниот парох и декан дон Паво Шеќерија и канцеларот о. Марјан Ристов.
Во својата проповед бискуп Стојанов меѓу другото истакна: Вознесението (Успението) на Марија е порака до нас верниците. Колку посериозно го живееме својот живот и повик на земјата, толку повеќе радост ќе уживаме во небесната слава. Колку повеќе го разбереме и доживееме нашиот позив како одговорно татковство и мајчинство, како солидарна грижа за братот човек во која нѐ носи и поттикнува Божјата љубов, толку повеќе можеме да очекуваме дека и нас Господ Бог ќе не воздигне во небесната слава над ангелите.
Нека постојано на овој пат нѐ храбри примерот на Марија, а нејзиното посредување и застапништво нѐ придружува, за да можеме ние, нејзините деца, заедно со неа да ја уживаме небесната слава, чија врата ни ја отвори Христос со своето воскресение и вознесение, за да потоа и таа влезе преку нив прославена со душата и телото, со што имаме потврда дека Бог ќе го исполни и на нас она што го вети, како што направи со својата скромна слугинка, прославувајќи ја во своето царство за вечни векови.
Катедралата беше исполнета со верници, а за време Мисата пееше катедралниот хор под водство на маестро Јулија, а на крајот од светата Миса имаше процесија околу катедралата со статуата на Мајка Божја.
к.мк
