Папата: Не треба да се шпекулира со водата; итно е потребно планирање за одржливо управување
На Светскиот ден на храната, Папата испрати порака до генералниот директор на Организацијата за храна и земјоделство на Обединетите нации (ФАО), Ку Донгју, во која бара на сите да им се загарантира пристап до водните ресурси кои никогаш не смеат да се сметаат за стока или производ за размена.
Обединете ги силите и пронајдете идеи за водата да стане наследство на сите, за подобро да се распоредува и да се управува на одржлив и рационален начин – ова е барањето на папата Фрањо до меѓународните организации, владите, граѓанското општество, претпријатијата, академските и истражувачките институции, во пораката испратена до генералниот директор на Организацијата за храна и земјоделство на Обединетите нации (ФАО), Ку Донгју, по повод Светскиот ден на храната, кој оваа година се одбележува на тема „Водата е живот, водата е храна. Не оставајте никого зад себе“. Оваа тема – според Папата, ја истакнува незаменливата вредност на водата како ресурс за сите живи суштества на Земјата, што бара итно планирање на мудро, внимателно и одржливо управување за секој да може да ужива во неа и да ги задоволи своите суштински потреби, и така што може да се поддржи и да се промовира соодветен човечки развој без никој да биде исклучен.
Направете ги достапни основните ресурси
Има многу наши браќа кои денес живеат во беда – истакна Папата – а крикот на мака и очај на сиромашните мора да ни ја поттикнува нашата совеста. Гладот и неухранетоста, кои сериозно погодуваат многу човечки суштества, се резултат на неправедното акумулирање на неправдата и нееднаквоста, што остава многумина на работ на животот, а на некои им овозможува да живеат во раскош и изобилство. Сето тоа се однесува на храната, како и на сите суштински ресурси, чија недостапност за многумина е навреда на вроденото достоинство дадено од Бога – напоменува и нагласува – затоа треба да дејствува меѓународната заедница.
Потребни се поголеми инвестиции во инфраструктурата за употребата на водата
Во однос на водата, која е живот затоа што гарантира опстанок, Папата истакна дека во моментов овој ресурс е загрозен од сериозни предизвици во однос на квантитет и квалитет и дека на многу места на нашата планета нашите браќа страдаат од болести или умираат токму затоа што нема вода за пиење или има премалку. Римскиот бискуп, дополнително, истакна дека сушите предизвикани од климатските промени предизвикуваат огромни штети на екосистемите и населението и го осуди самоволното управување со водните ресурси, нивното нарушување и загадување, што особено им штети на сиромашните.
Итно е неопходно да се признае дека пристапот до безбедна и вода за пиење е основно, и универзално човеково право, бидејќи тоа го одредува опстанокот на луѓето и затоа е услов за остварување на другите човекови права – рече Папата, повикувајќи се на неговата енциклика „Laudato si“, поттикнувајќи на повеќе инвестиции во инфраструктурата, канализациони мрежи, хигиенски и санитарни системи и третман на отпадни води, особено во пооддалечените и неразвиени рурални области. За папата Фрањо, исто така е важно да се развијат образовни и културни модели кои ќе го сензибилизираат општеството за да се почитува и зачува ова примарно добро, бидејќи водата никогаш не треба да се смета за обична стока, производ за размена или предмет на шпекулации.
Треба да се вклучат науката и технологијата
Водата е храна затоа што е од суштинско значење за постигнување на безбедноста на храната – истакна Папата, додавајќи дека таа е и многу потребна компонента за земјоделството. Затоа, неопходно е – според него – да се промовираат ефективни програми со кои се избегнува истекување во цевките за наводнување во земјоделството; користете органски и неоргански пестициди и ѓубрива кои не ја загадуваат водата; да се поддржат, меѓу другото, мерките со кои се зачувува достапноста на водните ресурси со цел да се избегне сериозниот недостиг да стане причина за конфликт меѓу заедниците, народите и нациитр. Затоа, науката и технолошките и дигиталните иновации треба да се стават во служба на одржлива рамнотежа помеѓу потрошувачката и расположливите ресурси – предлага Светиот Отец – избегнувајќи негативни влијанија врз екосистемите и неповратни штети на животната средина.
Делувајте солидарно
Во врска со Светскиот ден на храната, Папата истакна дека неговото одбележување треба да нè потсети дека на културата на отфрлање мора одлучно да се спротивставиме со акција заснована на одговорна и доследна соработка на сите. Во исто време, тој повторно предупреди дека нашиот свет е премногу меѓузависен и не може да си дозволи да се подели на блокови од земји кои на лажен и пристрасен начин ги промовираат сопствените интереси. Напротив, повикани сме да размислуваме и дејствуваме во смисла на заедништво и солидарност и да им дадеме приоритет на животите на сите луѓе пред присвојувањето на добра од неколкумина – истакна Папата.
На крајот, римскиот бискуп истакна дека денес, поради кризи и конфликти, сме сведоци на скандалозна поларизација на меѓународните односи и дека огромни финансиски и иновативни технолошки ресурси, кои може да се искористат за да се направи водата извор на живот и напредок за сите луѓе, се насочени кон производство и трговија со оружје. Никогаш досега не било толку итно неопходно да станеме промотори на дијалогот и творци на мирот – истакна папата Фрањо, додавајќи на крајот дека поради оваа причина Црквата никогаш не се заморува да ги сее оние вредности кои градат цивилизација која наоѓа водство во љубовта, почитта и взаемната помош, со посебно внимание на оние кои најмногу страдаат, на гладните и жедните.
Ватикан њуз/к.мк
