Папата Фрањо се сретна со членовите на Меѓународната мешовита комисија за теолошки дијалог меѓу Католичката црква и Источните православни цркви.
Во своето обраќање Светиот Отец се заблагодари на Комисијата за нејзината вредна работа, која овозможи значителен напредок во процесот на дијалогот кон полно заедништво. Комисијата е при крајот на важната студија за Светите Тајни, документ кој покажува широк консензус и кој, со Божја помош, ќе може да означи нов чекор кон полно заедништво, истакна Светиот Отец.
Три димензии
Нагласувајќи ги трите екуменски димензии – крштелна, пасторална и локална, папата Фрањо најпрвин истакна дека екуменизмот во суштина е крштелен – „во крштението се наоѓа основата на заедништвото меѓу христијаните и копнежот за полно видливо единство“, рече тој.
Продлабочување на пасторалниот екуменизам
Потоа истакна дека широкиот консензус постигнат од Комисијата – не само за Крштението, туку и за другите Свети Тајни – треба да ги поттикне Католичката црква и Источните православни црква да го продлабочат пасторалниот екуменизам.
Во изминатите децении беа потпишани голем број пасторални договори со некои Источни православни цркви, кои им овозможуваат на верниците да учествуваат во Светите Тајни во конкретни околности, дури и без полно заедништво, истакна Папата. Сето ова беше возможно поради погледот на конкретниот живот на членовите на Божјиот народ и нивното добро, кое е поголемо од идеите и историските разлики, и поради важноста да не се остави никој без средствата за благодат. Папата Фрањо изрази надеж дека „Светиот Дух ќе вдахнови начини да продолжиме да чекориме по овој пат“. Тој пат, нагласи Петровиот наследник, се фокусира на доброто на Божјиот народ, а не на моралните, теолошките или идеолошките разлики.
Локална реалност
Светиот Отец понатаму посочи дека екуменизмот веќе постои првенствено како локална реалност – како што рече, во форма на „екуменизам на животот“ – не само на Блискиот Исток, туку и во западните земји во кои емигрирале христијаните од тој простор.
„Многу верници – особено оние на Блискиот Исток, но и оние кои емигрирале на Запад – веќе го доживуваат екуменизмот на животот во секојдневниот живот на нивните семејства, на работа, во секојдневните посети. И често заедно го доживуваат екуменизмот на страдањето, во заедничко сведоштво за името Христово, понекогаш дури и по цена на живот“.
Затоа, тој рече дека „теолошкиот екуменизам“ треба да гледа не само на догматските разлики што се појавија во минатото, туку и на сегашното искуство на нашите верници.
„Дијалогот за науката би можел теолошки да се прилагоди на дијалогот на животот што се развива во локалните и секојдневните односи на нашите Цркви, кои сочинуваат вистинско теолошко место.
Со цел да се зголеми братското познавање, Папата дополнително ја истакна важноста од вклучување на помладите генерации, активни во локалните заедници, „така што дијалогот за науката да тече заедно со дијалогот на животот“. Екуменизмот на заедничкото одење се постигнува со одење, а не само со идеи, нагласи папата Фрањо.
Осврнувајќи се на темата за следната фаза од дискусијата во Комисијата, која ќе се фокусира на Дева Марија во учењето и животот на Црквата, папата Фрањо го заврши своето обраќање со една древна молитва до Богородица и ја повика за заштита и поддршка на нивната работа.
Ватикан њуз/к.мк
