Во сабота 23 март 2024 годиина, во пресрет на празникот Цветници, според грегоријанскиот календар, се одржа традиционалниот Крстен пат на Водно во организација на катедралната парохија Пресвето Срце Исусово – Скопје. Побожноста ја предводеше Скопскиот бискуп и Струмичко – скопски епарх, монс. Киро Стојанов во заедништво со катедралниот капелан Томислав Рукавина, сестри Евхаристинки, сестри на Мајка Тереза, претставници на црковните движења и верници.
На 6 километарската патека од Средно Водно до Јубилејниот крст верниците наизменично го носеа дрвениот крст, читајќи текстови од побожноста Крстен Пат, молеа Света Бројаница и пееја пригодни песни.
На врвот на Водно под Јубилејниот крст, бискупот Стојанов ја измоли завршната молитва, изразувајќи благодарност на организаторите и присутните верници за реализирањето на оваа побожност.
Посебен беше призорот на случајните минувачи, кои искажуваа почит на молитвите за Страдањата Христови, а некои од нив се и приклучија на молитвата.
Крстниот пат на Водно се моли традиционално секоја година од 2014 година.
к.мк
