Христијанските водачи од Ерусалим повикуваат на status quo

Христијанските водачи од Ерусалим повикуваат на status quo

Го потврдуваме својот јасен став со повикот да се одржи status quo во Светиот град додека да се постигне мировен договор помеѓу Израелците и Палестинците врз основа на преговорите и меѓународното право – стои во објавената божиќна порака од патријарсите и водачите на Црквите во Ерусалим.

Во текстот на 13 христијански водачи – меѓу кои и надбискупот Пјербатиста Пицабала, апостолски управител на Латинско ерусалимскиот патријархат, и кустосот во Светата Земја фра Франческо Патон – повторуваат дека присуството и сведоштвото на христијаните во Светата Земја се тесно поврзани со светите места и со нивната достапност како места за состаноци и средби за единство меѓу народите со различни вероисповеди. Тие света места му даваат смисла на ова подрачје – велат христијанските водачи.

Секој исклучителен политички пристап – стои понатаму во пораката – ќе го лиши градот од неговата вистинска суштина , како и од неговите одбележја, и притоа гази на механизмот кој со векови го одржувал мирот. Ерусалим е свет дар, табернакул, свето тло за целиот свет – велат христијанските водачи и предупредуваат: Напорите да се запоседне Светиот град Ерусалим или да се ограничи со услови за исклучивост ќе доведе до многу мрачна реалност.

Во ова време додека го очекуваме доаѓањето на Спасителот – стои во пораката – ја пренесуваме Радосната вест на веселба, надеж и мир од Градот на надежта и мирот, Ерусалим! Од година во година се придружуваме на Универзалната Црква во славењето на раѓањето на нашиот Господ и Спасител Исус Христос. Овоплотеното Слово кое стана Тело и понатаму и по две илјади години е извор на радоста, надежта и мирот и покрај страдањата и неволјите на многу народи и заедници во целиот свет.

Продолжуваме да се молиме за целата област на Блискиот Исток и го молиме Кнезот на мирот да ги вдахне срцата и умовите на сите оние на власт да одат по патот на мирот, правдата и помирувањето меѓу народите. Додека го славиме доаѓањето Христово како светлина на светот, нè вдахнува и утешува со зборовите од химната на Захариј: „Ќе нè посети Младо Сонце за да ги просвети оние, што седат во темнина и сенка смртна, и да ги упати нозете наши по патот на мирот – порачаа на крајот христијанските водачи.

РВ/к.мк

Категорија: Вести, Свет

За авторот