Папата Лав XIV потпиша хирограф со кој се создава нова управна комисија за обновување на Фондацијата „Дом за олеснување на страдањето“, основана во италијанскиот град Сан Џовани Ротондо од свети Пио од Пјетрелчина.
Фондацијата Casa Sollievo della Sofferenza („Дом за олеснување на страдањето“), голем италијански здравствен центар роден од сонот на свети Пио од Пјетрелчина во Сан Џовани Ротондо, се подготвува за нова фаза на обнова.
Папата Лав XIV потпиша хирограф со кој се формира Комисија за водство и надзор на Фондацијата, со мандат да ги утврди најдобрите решенија за зајакнување на нејзината ефикасност, делотворност и долгорочна одржливост.
Новиот управен комитет ќе го води префектот на Секретаријатот за економија, Максимино Кабалеро Ледо, а ќе го координира секретарот на Управата за имотот на Апостолската столица, APSA, Фабио Гасперини.
Членови на комисијата се заменикот за општи работи во Државниот секретаријат, надбискупот Паоло Рудели; претседателот на APSA, надбискупот Џордано Пичиноти; и надбискупот Џорџо Ферети од Фоџа-Бовино.
Папата ги назначи и д-р Бенјамин Естевез де Комингес, д-р Џино Гумирато и адвокатот Алесандро Ела Ојана за членови на Техничкиот комитет.
Одлуката произлегува од љубовта на Апостолскиот Престол кон делата на милосрдието и од свеста дека големите институции, за да останат верни на својата мисија, мора да бидат способни да се соочат со предизвиците на промените.
„Развојот на времето, технологијата, правото и економијата“, се наведува во хирографот, „ја става мисијата на Црквата пред предизвикот на постојана обнова“, особено во здравствениот сектор, кој бара визија, инвестиции и разумно управување.
Меѓу овие институции е и „Домот за олеснување на страдањето“, основан „со цел да им понуди гостопримство, помош и грижа на болните, на ходочесниците и на нивните семејства, вдахновен од духовноста и ликот на неговиот свет основач“.
За „да се соочи со овој предизвик и да го прифати“, папата Лав XIV одлучи да формира „Комисија за водство и надзор на Фондацијата Casa Sollievo della Sofferenza, дело на свети Пио од Пјетрелчина, капуцин“, со задача да ја анализира моменталната состојба на Фондацијата, да ги утврди најдобрите решенија за поголема ефикасност, делотворност и долгорочна одржливост на нејзината работа и мисија, како и конкретно да ги спроведе утврдените решенија.
Комисијата ќе работи на сите нивоа, економско, имотно и оперативно, со целосна способност да дејствува и да ги спроведува потребните акти на редовна и вонредна администрација.
Таа ќе поднесува извештаи директно до Папата пред секоја одлука од особено значење, како и пред усвојување акти што имаат значајно влијание врз средствата на Фондацијата или го менуваат нејзиниот Статут.
„Домот за олеснување на страдањето“ се роди од конкретната вера на Падре Пио, кој беше убеден дека грижата за телото е составен дел од христијанската мисија.
Децении подоцна, таа интуиција останува жива. Хирографот на Лав XIV е гест на грижа, истата грижа со која светецот од Пјетрелчина не сакал ниеден болен човек, ходочесник или член на семејство да остане без прием и помош.
Обновата на „Домот за олеснување на страдањето“ претставува чин на верност кон основачот, кон мисијата на делото и кон сите оние што секојдневно минуваат низ неговите врати барајќи исцелување и надеж.
Ватикан њуз/к.мк
