Папата Лав ѝ пишува на една мајка: Довери ѝ се на Марија за да се соочиш со секоја неизвесност
Во најновото издание на списанието Пјаца Сан Пјетро, Папата Лав XIV одговара на писмото на Лаура, мајка која сподели дел од своите борби со верата, и ја повикува да стои до Дева Марија како цврст пример во тешкотиите.
Папата Лав XIV одговори на писмото на жена по име Лаура, која сакаше да ги сподели радостите и борбите на својата вера.
Светиот Отец ја прими нејзината порака преку месечното издание на Базиликата Свети Петар, списанието Пјаца Сан Пјетро, а одговорот на Папата беше објавен во неговото најново издание.
Како одговор на прашањата на оваа сопруга и мајка за начинот на кој да се справи со тешкотиите, Папата ја повика Лаура јасно да ги именува и да го сподели своето лично искуство.
Лаура се прашува и бара совет од Папата како да ги надмине искушенијата кои изгледа дека ја совладуваат, иако ужива во големата љубов што ја добива од својот сопруг и од своите три прекрасни ќерки, воспитувани во христијанската вера – вера што самата ја опишува како „посилна од кога било“.
Таа се запрашува дали на таа вера ѝ недостасува цврстина.
Папата Лав подвлекува:
„Вашиот ентузијазам за верата и вистината на вашето срце се благослов за вас и за вашето семејство. […] Ако вашиот пример е Марија, ќе можете да се соочите со секоја неизвесност. […] Споделувањето проекти на христијанска љубов е суштинско за духовниот напредок и за соработка со Божјата благодат и Божјата волја.“
Ова се делови од она што го пишува Папата, како што се истакнува во соопштението за медиумите објавено во понеделник, 18 август, од редакцијата на списанието.
Дијалог, одмор, мир, единство: Теми на августовското издание
Месечното издание содржи и посебен прилог за Средбата на братството, закажана да се одржи во Рим на 12 и 13 септември – можност за средба, блискост и заедничко споделување преку дијалог.
Во него е објавен и обемен текст за тековната нишка на мирот во историјата на дванаесетте Папи, како и на Лав XIII до Лав XIV, и за нивната длабока поврзаност со братството.
Во уредничкиот текст со наслов Одмор, братство и мир, отец Енцо Фортунато размислува за значењето на летниот период како време за одмор.
Симболот на најновото издание на Пјаца Сан Пјетро ја евоцира првата заедница собрана околу Исус, која на тој начин станува слика за Црква повикана да гради мостови, а не ѕидови.
Ватикан њуз/к.мк
