Примајќи ги во аудиенција учесниците на Генералното собрание на сестрите на Света Доротеја, папата Фрањо нагласи дека институтите на посветен живот се складишта на големото наследство и богатата традиција на синодалност.
Во петок 18 март 2022 година, примајќи во Ватикан група сестри на Света Доротеја по повод нивното Генерално собрание, кое започна на 3 март, Папата рече дека искуството на Собранието во посветениот живот е конкретен начин за спроведување на синодалноста: силно време на братство, слушање, дијалог и сѐ во светло на Светиот Дух.
Светиот Отец се осврна на темата на Генералното собрание на сестрите – „Заминаа по друг пат“ (Матеј 2, 12), преземено од евангелскиот извештај за мудреците кои отидоа по друг пат за да го заобиколат царот Ирод. Меѓутоа, „другиот пат“ не мора да значи само друг пат, рече Папата, туку и поинаков, нов начин на одење. Како и учениците на патот кон Емаус, кои се вратија во Ерусалим преобразени по средбата со воскреснатиот Господ, така и сестрите на Света Доротеја сега можат да „кренат по патот“ што им го покажа самиот Исус, во денешниот живот на институтот.
Институтите на посветен живот, истакна понатаму папата Фрањо, се складишта на големото наследство и богатите традиции на синодалност, додавајќи дека заедничкото одење со Христос и во Духот ја сочинува суштината на посветениот живот. Одејќи заедно во Духот, рече тој, втиснува стил на заедништво и учество обележан со посланието.
Папата потоа размислуваше за овие три концепти: заедништво, учество и послание. Папата им рече на сестрите дека за заедништвото можат да научат од нивната основателка, Света Паула Фрасинети, која, како и другите големи основачи, копнеела да го репродуцира моделот на заедништво видлив во единството на апостолите околу Исус, како и во првата христијанска заедница во Ерусалим.
Света Паула, додаде Светиот Отец, исто така ни го покажува патот за учество, со тоа што дозволила да ја вознемируваат повиците, недостатоците, потребите во нејзиното време, што ја поттикна да се надмине самата себе и да помогне на другите.
Основателката на сестрите Света Доротеја е и модел за послание, бидејќи прими харизма за „евангелизација преку образование и образование преку евангелизација“. Ова сега е посланието на сестрите на Света Доротеја, рече Папата, додавајќи дека и понатаму ќе бидат плодно присуство во Црквата во мерата во која ќе бидат верни на тоа послание.
Иако посланието во образованието е секогаш актуелно, тоа е особено важно денес, во културен и социјален контекст кој повикува на нов „образовен пакт“. Папата ги охрабри сестрите да го дадат својот максимум и континуирано да ја оживуваат својата посветеност кон новите генерации и со нив. Своето обраќање Светиот Отец го заврши повикувајќи ги сестрите со ентузијазам да го продолжат своето одење, пренесувајќи ја методата на воспитување на света Паула, преку патот на срцето и љубовта, за да може секој човек сам да ја обликува својата иднина.
Ватикан њуз/к.мк
