Папата Фрањо испрати писмо до надбискупот Виктор Мануел Фернандез, кој ќе раководи со Дикастеријата за наука на верата
Главната цел на Дикастеријата за наука на верата е да ја зачува науката што произлегува од верата за да даде причини за нашата надеж, но не како непријатели кои предупредуваат и осудуваат – напиша папата Фрањо во писмото упатено до новиот префект на Дикастеријата, надбискупот Виктор Мануел Фернандез, кој го наследи кардиналот Луис Франциско Ладарија Ферер СИ, кому Папата му се заблагодари за неговото служење.
Во писмото Светиот Отец ги истакнува неморалните методи кои ги користела дикастеријата во минатото, а кои наместо да промовираат теолошко знаење, се занимавале со можни доктринарни грешки. Посебна главна задача на новиот префект ќе биде, објасни Светиот Отец, да се посвети на зачувување и оживување на верата, бидејќи е формиран посебен оддел со висококомпетентни стручњаци за дисциплински прашања.
Главната задача на дикастеријата – потсети папата Фрањо – е да ја чува верата. Тоа значи да се зголеми познавањето и пренесување на верата во служба на евангелизацијата, така што нејзината светлина е мерило за разбирање на смислата на постоењето, особено пред прашањата кои го поттикнуваат напредокот на науката и развојот на општеството. Овие прашања стануваат средства за евангелизација кои ни овозможуваат да влеземе во разговор со актуелниот контекст кој нема преседан во историјата на човештвото.
Папата објасни дека Црквата треба да расте во толкувањето на објавеното Слово и во разбирањето на вистината, но тоа не подразбира наметнување само на еден начин за нејзино изразување. Различните текови на филозофска, теолошка и пастиорална мисла, доколку Духот ги усогласи во почит и љубов, можат да ја поттикнат Црквата да расте, а токму тој хармоничен раст ќе ја зачува христијанската доктрина поефикасно од кој било механизам на контрола.
Задачата на дикастеријата, значи, е да поттикне охрабрување на Црквата во однос на харизмата на теолозите и нивните напори во теолошкото истражување, за да не се задоволат со „трпезно“ богословие, студена и крута логика која има тенденција да доминира над сè. Секогаш ќе биде вистина – продолжува во писмото Папата – дека реалноста е над идејата; затоа, неопходно е теологијата да внимава на еден фундаментален критериум: да го смета за несоодветно секое богословско сфаќање што на крајот ја доведува во прашање Божјата семоќ и, особено, неговата милост.
Затоа, ни треба начин на размислување што може убедливо да го прикаже Бог кој љуби, кој простува, кој спасува, ослободува, кој ги унапредува луѓето и ги повикува на братско служење. Ова се случува – објасни Римскиот бискуп – доколку објавата се фокусира на суштинското, на најубавото, најголемото, најатрактивното и во исто време најпотребното. Постои хармоничен ред меѓу вистините на нашата порака, каде што најголемата опасност се јавува кога споредните прашања ги засенуваат главните. Со оглед на ова богатство, задачата што папата Фрањо ја наведе за новиот префект подразбира и посебна грижа при проверката дали документите на дикастеријата, како и другите, имаат соодветна теолошка поддршка, дали се во согласност со богатиот контекст на безвременското учење на Црквата и, во исто време, дали го прифаќаат неодамнешното учење.
Ватикан њуз/к.мк
