Во порака до Меѓународната федерација на католички универзитети, папата Лав XIV ги повикува католичките универзитети да останат цврсто вкоренети во Христос, изворот на вистинската мудрост.
Во пораката упатена до учесниците на 28. Генерално собрание на Меѓународната федерација на католички универзитети (IFCU), одржано во Гвадалахара, Мексико, папата Лав XIV во понеделник, 28 јули 2025 година понуди размислување за улогата на католичките универзитети во современиот свет, повикувајќи ги да останат вкоренети во Христос, изворот на мудроста и вистината.
Собранието ја одбележува стогодишнината од основањето на IFCU и се одвива под мотото: „Католички универзитети: кореографи на знаењето“. Осврнувајќи се на темата, Папата рече дека тоа е прекрасен израз, кој „евоцира хармонија, единство, динамика и радост“.
Универзитетите: Пат на умот до Бога
Во своето обраќање, папата Лав предупреди дека современиот културен пејзаж е исполнет со „песните на сирените“ – идеи што се привлечни поради нивната новина, популарност или привидна сигурност. Во тој контекст, католичките универзитети се повикани да бидат пат „на умот до Бога“, со што ја одразуваат мислата на свети Бонавентура.
Цитирајќи ги светите Отци, вклучувајќи ги свети Августин и свети Павле, Папата ја нагласи трајната потреба католичките институции да го осветлуваат човечкиот дух преку втемелување на знаењето во божествената вистина.
„Душата, оставена сама на себе, нема ни светлина, ни сила“, рече тој, цитирајќи го свети Августин. „Таа потемнува кога се одвраќа од изворот на непроменливата вистина, и се просветлува кога Му се приближува.“
Во таа светлина, Папата потврди дека универзитетската средина, обележана со дијалог и интелектуален плурализам, е длабоко сообразена со посланието на Црквата.
Ангажман со различни гледишта
Уште од почетоците на евангелизацијата, христијаните ја препознавале важноста на ангажирање со различни светогледи. Папата се потсети на примерот на свети Павле, кој ги повикувал христијаните во Рим да ги испитаат плодовите на нивниот поранешен начин на живот, укажувајќи дека без Христос човечката мудрост води во смрт.
„Христос не е странец за разумниот дискурс“, рече папата Лав, „туку темел-камен кој им дава кохерентност и смисла на сите наши мисли, надежи и напори за подобрување на животот и за пронаоѓање на смислата.“
Размислувајќи за мислата на свети Тома Аквински, Папата истакна дека Христос, како Мудрост, е централна Личност во верата, достапна и за универзалниот човечки разум.
Цитирајќи го коментарот на Аквински за Sententiae, Папата нагласи дека мудроста – без разлика дали се сфаќа како природна интелектуална способност или како дар од Бога – „се однесува пред сè на божественото“ и претставува цврста основа за дијалог со сите култури и школи на мисла.
Силата на христијанскиот идентитет
Католичките универзитети, рече Папата, не треба да се дистанцираат од Христос, ниту да ја релативизираат Неговата единствена улога во име на академската слобода. Тие се повикани со почит и плодотворно да се ангажираат со сите традиции на знаење, токму од силата на својот христијански идентитет.
Во завршната мисла од пораката, папата Лав XIV изрази надеж дека Христос-Мудрост – Личноста што е создадена од Вистината и го привлекува светот кон Себе – ќе биде водечки компас за сите католички институции на високо образование.
„Нека познавање на Него, полно со љубов, биде поттик за нова евангелизација во областа на католичкото високо образование“, рече тој.
Светиот Отец го упати својот апостолски благослов на сите присутни на Собранието и на институциите што ги претставуваат.
Ватикан њуз/к.мка
