Папата Фрањо на 26 октомври 2017 година го посети римското претставништво на Фондацијата Scholas Occurrentes и тоа прв пат по неговото отворање во јуни оваа година. Потсетуваме дека Scholas Occurrentes е организација со Папско право, формирана во 2013 година по желба на Папата и врз основа на иницијативата која ја започна на перифериите од Буенос Аирес, како тогашен надбискуп, а опфаќа мрежа на јавни и приватни образовни установи од различни вероисповеди, кои имаат за цел промовирање на култура на средби, дијалог и почитување на различностите.
Ова беше посебна можност за Папата, кој секогаш учествува во активностите на оваа организација, а тука имаше можност да разговара со студенти кои живеат во тешки услови во Мексико, Парагвај, Аргентина, Порторико и Тексас, ги слушна нивните приказни, но и сведоштва за помошта која ја дава Scholas Occurrentes.
Меѓу темите за кои се разговарало истакнати се оние кои се поврзани со миграцијата и прифаќањето, на оние во потреба – според зборовите на Папата – и на новиот и на стариот континент, а кои секогаш се извор на заемно збогатување. Од сите народи барам да им се помогне на мигрантите, бидејќи се ветување за живот во иднината – рече Папата, меѓутоа побара и од мигрантите да го чуваат народот кој ги прифаќа, почитувајќи ги нивните закони.
РВ/к.мк
