Папата: „Бог да ги благослови сите кои се посветени на борбата против трговијата со луѓе!
Папата Фрањо по молитвата Ангел Господов на 30 јули 2023 година, потсети дека денес се одбележуваат два светски дена на ОН: Светскиот ден против трговијата со луѓе и Меѓународниот ден на пријателството. Тој ги повика сите да работат на запирање на злоупотребата на луѓето преку трговија со луѓе, молејќи се за сите оние кои се борат против трговијата со луѓе
По неделната молитва Ангел Господов, Светиот Отец потсети дека на 30 јули се одбележуваат два светски дена прогласени од Обединетите нации. Првиот, Меѓународниот ден на пријателството, ја нагласува важноста на пријателството меѓу народите и културите, посочи Папата.
Друга тема го одбележува Светскиот ден против трговијата со луѓе, кој има за цел да го запре криминалот што ги претвора луѓето во роба, рече Папата.
„Трговијата со луѓе е ужасна реалност која погодува премногу луѓе: деца, жени, работници…, толку многу експлоатирани луѓе; сите тие живеат во нехумани услови и трпат рамнодушност и отфрленост од општеството“.
Папата истакна дека денес криминалот на трговија со луѓе е многу раширен во нашиот свет. Тој ги пофали оние кои работат на тоа подрачје и им пружаат помош на жртвите.
„Бог да ги благослови сите што се залагаат за борба против трговијата со луѓе!“
Темата на Светскиот ден за борба против трговијата со луѓе оваа година гласи: „Да се допре до секоја жртва на трговија со луѓе, не оставајќи никого зад себе“. Светскиот ден за борба против трговија со луѓе има за цел да ја подигне свеста за загрижувачкиот развој и трендови на терен и ги повикува владите, полицијата, јавните служби и граѓанското општество да ги проценат и зајакнат нивните напори за зајакнување на превенцијата, идентификување и поддршка на жртвите и ставање крај на неказнивоста.
Папата Фрањо многупати досега зборуваше за злото на оваа реалност, велејќи дека трговијата со луѓе го нарушува достоинството. Експлоатацијата и поробувањето ја ограничуваат слободата и ги претвораат луѓето во предмети за користење и фрлање. Системот на трговија со луѓе профитира од неправдата и злото што принудува милиони луѓе да живеат во услови на ранливост.
Ватикан њуз/к.мк
