Папата Фрањо е на пат да се врати во Ватикан по 12-дневната посета на Индонезија, Папуа Нова Гвинеја, Источен Тимор и Сингапур. Пристигнувањето на аеродромот Фиумичино во Рим се очекува во попладневните часови.
Полетувањето на авионот на „Singapore Airlines“ во 6 часот и 25 минути по средноевропско време, односно во 12 часот и 25 минути по локално време, го означи крајот на 45-то апостолско патување на папата Фрањо, најдолгото од почетокот на неговиот понтификат. На аеродромот Чанги во Сингапур, Папата го пречека министерот за култура, заедници и млади, во салата „Дендробиум“, каде што кратко се задржа во разговор, пред да се качи на летот кој трае повеќе од 12 часа. Пред да влезе во авионот, многу жители на Сингапур го поздравија, некои побараа селфи, а некои му подарија книга. Како и обично, Папата за време на патувањето ќе одговара на прашања на присутните новинари во авионот.
Најдолгото патување
Последниот настан од престојот на Папата во Сингапур беше меѓурелигиската средба со младите во Catholic Junior Collegeu. Оттаму отиде на аеродромот во градот-држава за да се врати во Ватикан. За време на своето патување од 2 до 13 септември, папата Фрањо посети 4 земји: Индонезија, Папуа Нова Гвинеја, Источен Тимор и Сингапур, при што одржа 12 говори и 4 проповеди, а патувајќи од едно до друго место со 7 летови.
Во телеграмата упатена до претседателот на Република Сингапур, Тарман Шанмугаратнам, Папата ја изрази својата длабока благодарност за срдечното добредојде и великодушното гостопримство и ги загарантира неговите молитви за мир, единство и благосостојба на нацијата.
Ватикан њуз/к.мк
