Урби ет Орби: Кој се понижува ја разбира Христовата прослава
Љубовта ја надвладеа омразата, животот ја победи смртта, светлината ја избрка темнината! – со тие зборови Светиот Отец го започна своето традиционално обраќање Urbi et Orbi (на градот и светот), по воскресната Литургија која ја славеше на плоштадот Свети Петар.
Исус Христос од љубов кон нас – продолжи Папата – ја одзема од себе својата небесна слава; се испразни, на себе зема обличје на слуга и се понизи до смрт, смрт на крст. Затоа Бог Го воздигна и го направи Господ на вселената. Исус е Господ!
Со својата смрт и воскресение Исус на сите им го покажува патот на животот и среќата: тоа е патот на понизноста кој со собе го носи понижувањето. Тој е патот кој води до славата – истакна папата Фрањо и додаде: Само оној кој се понизува може да оди кон работите кои се таму горе, кон Бог. Горделивиот човек гледа одозгора долу, додека понизниот гледа оддолу кон горе
На Велигден наутро поттикнати од жените, Петар и Иван трчаат на гробот кој го наоѓаат отворен и празен. Тогаш се приближуваат и наведнуваат за да влезат во гробот. За да влеземе во тајната потребно е да се наведнеме, да се спуштиме. Според зборовите на Папата, само оној кој се понизува го разбира Исусовото прославување и може да тргне по тој пат.
Светот предлага по секоја цена да се наметнуваме, да се натпреваруваме, да ја покажеме својата вредност. Но – рече Светиот Отец – христијаните со милоста на Христос, мртов и воскреснат се пупки на друг вид на човештво во кое настојуваме да живееме; во служба едни на други. Тоа не е слабост, туку вистинска сила! Кој во себе ја носи Божјата сила нема потреба од употреба на насилство, туку говори и делува со силата на вистината, убавината и љубовта – рече Папата и продолжи:
Воскреснатиот Господ го молиме за милост да не паднеме во горделивоста која ги потхранува насилството и војните, туку да имаме понизна храброст за простување и помирување. Победоносниот Исус го молиме да ги олесни страдањата на многу наши браќа прогонувани заради Неговото име, како и на сите оние кои неправедно ги трпат последиците од конфликтите и насилствата кои се во тек.
Пред сè мир бараме за Сирија и Ирак да замолчи ѕвечкањето на оружјето и повторно да се воспостави добар соживот помеѓу населението на овие две сакани земји – рече Папата и многу сериозно додаде: Нека меѓународната заедница не остане неподвижна пред неизмерната човечка трагедија на подрачјето на овие земји и пред драмата на бројните бегалци.
Да молиме за мир за целото население на Светата Земја. Нека меѓу Израелците и Палестинците да блесне културата на средба и повторно да се покрене мировниот процес, и на тој начина да се стави крај на годините на страдање и поделба.
Мир молиме и за Либија – продолжи Папата – за да се запре апсурдното крвопролевање кое е во тек, како и секое варварско насилство, а оние кои се грижат за доброто на земјата нека се заземаат за промовирање на помирувањето и за изградба на братско општество во кое ќе се почитува достоинството на луѓето. И за Јемен посакуваме да надвладее заедничката волја за помирување за доброто на целото население. Истовремено со надеж му го доверуваме на милосрдниот Господ договорот постигнат овие денови во Лозана да биде дефинитивен чекор кон посигурен и побратски свет.
Од Господ го молиме дарот на мирот за Нигерија, за Јужен Судан и за Демокрската Република Конго. Нека од страна на сите луѓе со добра волја се воздигне постојана молитва за оние кои го изгубиле животот, за оние кои се киднапирани, за оние кои го напуштиле својот дом и своите најмили, посака Светиот Отец, додавајќи:
Нека Воскресението Господово донесе светлина за саканата Украина посебно на оние кои последните месеци беа изложени на насилство. Нека таа земја, благодарение на заземањето на сите заинтересирани страни повторно го пронајде мирот и надежта.
Мир и слобода молиме и за многу луѓе подложени на новите и старите облици на ропство, криминалните организации и криминалците – додаде и Папата сериозно продолжи: Мир и ослободување за жртвите на трговците со дрога, многу пати здружени со властите кои би требало да застанат во одбрана на мирот и хармонија во човечките семејства. Мир бараме и за овој свет подложен на трговците со оружје кои заработуваат на крвата на мажи и жени.
Маргинилизираните, затворениците, сиромашните и мигрантите кои често се одбивани, злоупотребувани и отфрлени; болните и патниците; децата, посебно оние кои трпат насилство, нажалените; до сите луѓе со добра волја нека допре утешителниот глас на Господ Исус: Мир вам! Не плашете се, воскреснав и секогаш ќе бидам со вас!
Откако го подели својот апостолски благослов, Папата додаде: сакам да ги упатам своите велигденски честитки до сите вас кои дојдовте на овој плоштад од разни земји, како и до оние кои со нас се поврзани преку средствата на социјалната комуникација. Понесете го во своите домови и сите кои ќе ги сретнете радосното навестување дека воскресна Господ на животот, носејќи со себе љубов, праведност, почитување и простување!
Ви благодарам на вашето трпение, на вашите молитви и на ревноста на вашата вера. Особено се заблагодарувам за дарот на цвеќето кој и ова година доаѓа од Холандија. На сите Среќен Велигден! Молете за мене! – рече на крајот папата Фрањо.
РВ/Д.И.
