Надбискупот Еторе Балестреро, постојан набљудувач при Обединетите нации во Женева, говореше на 61. редовна седница на Советот за човекови права: земјите должници треба да воспостават систем на добро управување дома, а земјите доверители не треба да придонесуваат за продлабочување на сиромаштијата.
Да мораш да враќаш прекумерен долг и притоа да не можеш да ги обезбедиш средствата потребни за општото добро, односно за задоволување основни потреби како храна, питка вода, здравствена заштита, домување и социјална заштита. Ова, предупреди надбискупот Еторе Балестреро, постојан набљудувач на Светиот Престол при Обединетите нации во Женева, се случува во премногу земји, особено во земјите на глобалниот Југ, истакна на 5 март 2026 година, на 61. редовна седница на Советот за човекови права.
Морална криза, а не економска дилема
Надбискупот се осврна на државите што се соочуваат со невозможен избор: да им отплаќаат на доверителите или да ги исполнат темелните обврски кон сопствениот народ. Тоа, според претставникот на Светиот Престол, не е само „економска дилема“, туку пред сè длабока морална криза и криза на човековите права. Исто така, истакна тој, прекумерниот долг го стеснува фискалниот простор, наметнува регресивни мерки на штедење и одржува кругови на сиромаштија и нееднаквост, што директно го попречува постепеното остварување на економските, социјалните и културните права.
Добри практики
Според надбискупот Балестреро, земјите должници треба да се обврзат на даночен систем што ги почитува начелата на добро управување, транспарентност, одговорност и отчетност. Доколку оданочувањето и јавната потрошувачка се доживуваат како праведни и насочени кон општото добро, додаде тој, се поттикнува општествената кохезија и доброволното учество, со што се зголемува способноста на државата да мобилизира ресурси.
Од друга страна, билатералните, мултилатералните и приватните доверители треба да обезбедат кредитните практики да го почитуваат човечкото достоинство и да не ја продлабочуваат сиромаштијата и тешкотиите.
„Не“ на „грабливите заеми“
Надбискупот Балестреро нагласи дека нелегитимните долгови, даночната конкуренција и „грабливите заеми“ се спротивни на заштитата на човечкото достоинство, бидејќи го нарушуваат општествениот договор и ја попречуваат способноста на државите да ги исполнат своите основни обврски.
На крајот, претставникот на Светиот Престол изрази надеж, потсетувајќи на зборовите на папата Лав XIV, дека на меѓународно ниво ќе се вложат сите напори за надминување на глобалните нееднаквости кои создаваат длабоки поделби меѓу континентите, земјите, па дури и во рамките на поединечни општества.
Ватикан њуз/к.мк
