Папата Фрањо испрати порака до учесниците на конференцијата во Ватикан за отпорност и климатски промени, повикувајќи ги сите нации да соработуваат во намалувањето на емисиите на јаглерод и да им помогнат на луѓето да се прилагодат на климатските промени.
Папската академија на науките е домаќин на дводневна конференција на 13 и 14 јули, со фокус на тема: „Отпорност на луѓето и екосистемите под климатски стрес“.
Во оваа прилика Светиот Отец упати порака до присутните и ги охрабри во напорите да разговараат за еколошката криза.
Феноменот на климатските промени стана вонредна состојба која повеќе не е на маргините на општеството. Наместо тоа, го зазеде централното место. Ги преобликува индустриските и земјоделските системи и негативно влијае на глобалното човечко семејство, особено на сиромашните и оние што живеат на економските периферии на нашиот свет, пишува Папата.
Светиот Отец посочи дека светот се соочува со двоен предизвик: намалување на климатските ризици преку намалување на емисиите и помагање и овозможување на луѓето да се прилагодат на климатските промени, кои постепено се влошуваат. Овие предизвици бараат од сите да осмислат повеќедимензионален пристап за заштита на луѓето и планетата, додаде тој.
Меѓународна соработка
Тој се осврна и на неговиот често употребуван термин „еколошко преобраќање“, нагласувајќи дека овој процес бара сите да бидат благодарни за Божјото создание, да живеат во заедништво меѓу себе и да соработуваат во решавањето на еколошките проблеми.
Потребни се храбри, кооперативни и визионерски напори меѓу верските, политичките, социјалните и културните лидери на локално, национално и меѓународно ниво за да се најдат конкретни решенија за тешките и растечки проблеми со кои се соочуваме, истакна папата Фрањо.
Папата ги повика најразвиените земји да ги намалат сопствените емисии на јаглерод, а истовремено повика на финансиска и технолошка помош за помалку просперитетните области во светот.
Пристапот до чиста енергија и вода за пиење се други прашања што светските лидери треба да ги решат, рече Папата, додавајќи дека на земјоделците им е потребна помош за да се пренасочат кон производство на поотпорни култури.
Сè е поврзано
Папата потсети на поврзаната загриженост за губењето на биолошката разновидност и различните војни кои го загрозуваат опстанокот на човекот и водат до проблеми со безбедноста на храната и зголемено загадување. Сè е поврзано, повтори папата Фрањо, додавајќи дека промовирањето на долгорочното заедничко добро на нашата планета е клучно за вистинско еколошко преобраќање.
Папата потсети дека Светиот Престол и Градот Ватикан неодамна пристапија кон Рамковната конвенција на ОН за климатски промени и Парискиот договор.
На крајот, папата Фрањо ги охрабри учесниците на конференцијата во Ватикан во нивните напори за луѓето и планетата. Работејќи заедно, мажите и жените со добра волја можат да се осврнат на обемот и сложеноста на прашањата пред нас, да го заштитат човечкото семејство и Божјиот дар на создавањето од климатските екстреми и да ги поттикнат добрата на правдата и мирот, заклучи тој.
Ватикан њуз/к.мк
