Папата на благословот „Urbi et orbi“: победи љубовта, победи милосрдието!

Ватикан, 31.3.2013 /к.мк/ – Околу 250.000 верници се собраа на свечено украсениот плоштад Свети Петар и улицата Виа дела Кончилијационе (Via della Conciliazione – улица на помирувањето) за да присуствуваат на свечената Велигденски миса, а веднаш потоа и да добијат Велигденски благослов од папата Фрањо.

По завршувањето на светата Миса папата се упати кон свечената ложа на базиликата Свети Петар од каде го упати својот благослов „Urbi et Orbi“ (до грдот и светот), при тоа Светиот Отец помина низ верниците, поздравувајќи се со нив. Посебен впечаток оставија неговите прегратки и долги разговори со две лица со посебни потреби.

За време на светата Литургија немаше проповед. Но исто така верниците ќе мора да се навикнат и на новоста која ја воведува папата Фрањо, а тоа е изоставувањето на Велигденскиот поздрав на повеќе јазици.

Еве што рече папата за време на благословот „Urbi et orbi“:

Драги браќа и сестри во Рим и во целиот свет, Среќен Велигден!

Многу сум радосен што можам да ви ја навестам оваа порака: Христос воскресна! Би сакал таа да пристигне во секој дом, во секое семејство, посебно таму кадешто страдањето е најголемо, во болниците, во затворите… .

Но пред сѐ би сакал да допре до срцето на секој човек, бидејќи токму таму Бог сака да ја посее оваа Радосна вест: Исус воскресна, има надеж за тебе, не си повеќе под власта на гревот и злото! Победи љубовта, победи милосрдието! Секогаш победува милосрдието Божјо.

И ние, како и жените Исусови ученички, кои појдоа на гробот и го најдоа празен, можеме да се запрашаме која е смислата на тој настан (Лука 24, 4). Што значи тоа дека Исус воскресна? Тоа значи дека Божјата љубов е посилна од злото и од самата смрт; тоа значи дека Божјата љубов може да го преобрази нашиот живот, да даде да процветаат пустините што се наоѓаат во нашето срце.

Таа иста љубов поради која Божјиот Син стана човек и го помина патот на понизноста и себедарувањето сè до крајот, сè до пеколот, до пропаста на одделеноста од Бог, таа иста милосрдна љубов го поплавила со светлина Исусовото мртво тело и го преобрази, и го воведе во вечен живот. Исус не се врати во претходниот живот, во земскиот живот, туку влезе во славниот Божји живот и тоа со нашето човештво, нѐ отвори за една иднина на надеж.

Еве што е Велигден: тоа е излез, премин на човекот од ропството на гревот и злото во слобода на љубовта и доброто (Иринеј, Adversus haereses, 4,20,5-7).

Драги браќа и сестри, Христос умре и воскресна еднаш засекогаш и за сите, но силата на Воскресението, тој премин од ропството на злото во слободата на доброто, мора да се случува во секое време, во конкретните простори од нашиот живот, во нашиот секојдневен живот. Колку пустини, и денес, луѓето мораат да поминат! Тоа е пред сѐ пустината што е во нас кога нема љубов кон Бога и ближниот, кога се нема свест дека сме чувари на сѐ што Створителот ни подарил и што ни го дарува. Но Божјето милосрдие може и најсувата почва да ја претвори во раскошна градина, тоа може повторно да ги оживее исушените коски (Ез 37, 1-14).

Еве го повикот којшто го упатувам до сите: да ја прегрнеме милоста на Христовото воскресение! Да дозволиме Божјето милосрдие да нѐ обнови, да дозволиме Исус да нѐ сака, да дозволиме силата на неговата љубов да го преобрази нашиот живот и да станеме орудие на тоа милосрдие, канали низ кои Бог ќе може да ја натопи земјата, да го чува целиот создаден свет и да даде да процветаат правдата и мирот.

И затоа го молиме Воскреснатиот Исус да ја преобрази смртта во живот, да ја претвори омразата во љубов, одмаздата во простување, војната во мир. Да, Христос е нашиот мир и по него ние молиме мир за целиот свет.

Мир за Блискиот исток, посебно помеѓу Израелците и Палестинците, кои се борат да постигнат договор, повторно подготвени и горди да им се вратат на преговорите со цел да заврши судирот што веќе трае предолго. Мир за Ирак, конечно, да престанат сите насилства, и пред сѐ за саканата Сирија, за нејзиното население рането во судирот и за многубројните бегалци кои чекаат помош и утеха. Колку многу крв е пролеана! И колку уште страдања ќе мораат да се поднесат пред да се пронајде политичко решение на кризата?

Мир за Африка, која сеуште е средиште на крвави судири. Во Мали, да се најде повторно единството и стабилноста; во Нигерија, каде, за жал, не престануваат атентатите, што озбилно го загрозуваат животот на многубројните невини лица, меѓу кои има и деца коишто терористичките групи ги држат како заложници. Мир на истокот од Демократската Република Конго и во Средноафриканската Република, кадешто многумина се присилени да ги напуштат своите домови и сè уште живеат во страв.

Мир во Азија, пред сѐ на Корејскиот полуостров, да се надвладеат несогласувањата и да завладее новиот дух на помирување.

Мир во целиот свет, којшто сѐуште е поделен поради алчноста на оние што бараат лесна заработувачка, ранет од егоизмот што му се заканува на животот и семејството, егоизмот што продолжува со трговијата со луѓе, со тоа најраспространето ропство во 21 век. Мир на целиот свет, растргнат од насилството поврзано со трговијата со дрога и погрешното искористување на природните богатства! Мир на ова наша Земја! Нека Воскреснатиот Исус им донесе утеха на оние што се жртви на природните катастрофи и нека нѐ направи одговорни чувари на створениот свет.

Драги браќа и сестри, на сите вас што ме слушате од Рим и од сите делови на светот, ви упатувам повик од Псалмите: „Благодарете му на Господ бидејќи е добар, бидејќи е вечна неговата љубов! Нека рече домот Израилов: Вечна е љубовта негова!“ (Пс 118, 1-2)

Категорија: Ватикан

За авторот

Write a Comment

<