Витлеемските јасли се светлина во нашиот свет, на кој му е потребна надеж, нагласи Светиот Отец, повикувајќи на зачувување на оваа традиција и на сведоштво за тоа колку е прекрасно да се биде ученик на Исус.
На 13 декември 2025 година, папата Лав XIV прими на аудиенција во Ватикан околу илјада учесници во „Живи витлеемски јасли“ – реконструкција на Христовото раѓање, кои истиот ден попладне парадираа низ улиците на Рим.
Оваа театарска претстава од големи размери, во која настапуваат актери од различни делови на Италија, заврши пред базиликата Света Марија Велика, каде што се чува Sacra Culla (латински: Света Лулка) – неколку дрвени фрагменти од јаслите во кои, според традицијата, Богородица го положила новородениот Христос во Витлеем.
Скапоцената порака од Витлеемските јасли
Папата истакна дека токму оваа древна реликвија, заедно со патувањето во Светата Земја, го вдахновиле Свети Фрањо во 1223 година да го одбележи „Раѓањето Христово во Гречо“, од кое се родила традицијата на божиќните пештери.
„Оттогаш, обичајот се прошири низ целиот свет со цел да се прикаже на различни начини Рождеството Господово – Бог, Кој „дојде без оружје, без моќ, […] за да ја победи гордоста, насилството и алчноста на човекот […] и да нè врати кон нашиот вистински идентитет“, забележа Светиот Отец, осврнувајќи се на зборовите на Бенедикт XVI.
Сведоштво за убавината на тоа да се биде Исусов ученик
„Папата Фрањо рече дека пред јаслите во Витлеем, „размислувајќи за сцената на Христовото раѓање, сме поканети на духовно патување, привлечени од понизноста на Оној што стана човек за да се сретне со секој човек“. Вистина е: од пештерата во Витлеем, каде што Марија, Јосиф и Детето се во нивната разоружувачка сиромаштија, тргнуваме по патот за да започнеме нов живот по стапките на Исус. Ќе сведочите за ова вечерва со поворката што ќе ја поминете низ улиците на градот. Благодарение на кореографијата, костимите и музиката, тоа ќе биде радосен знак за тоа колку е прекрасно да се биде Исусов ученик – Бог што стана човек, Сонцето кое изгрева „за да ги осветли оние што седат во темнина и во сенка на смртта, да ги води нашите нозе по патот на мирот“ (Лука 1,79)“, рече Лав XIV.
Јаслите – дар на светлина за нашиот свет
„Драги браќа и сестри, јаслите во Витлеем се важен знак: нè потсетува дека сме дел од прекрасна авантура на спасението во која никогаш не сме сами и дека, како што вели Свети Августин, „Бог стана човек за човекот да стане Бог, […] за човекот што живее на земјата да може да најде дом на небото“. Ширете ја оваа порака и одржувајте ја жива оваа традиција. Тоа е дар на светлина за нашиот свет, кој има голема потреба да продолжи да се надева“, заклучи Светиот Отец.
Ватикан њуз/к.мк
