Примајќи ги членовите на спортското здружение „Спорт во Ватикан“, кое го сочинуваат спортисти кои работат во Куријата, папата Фрањо ги поучи за основните правила за спортистите и истакна дека здравото натпреварување придонесува за созревање на духот.
Тренинг, дисциплина и мотивација се трите основни правила за спортистите на кои ги предупреди папата Фрањо, примајќи ги во четврток 9 февруари 2023 година во аудиенција членовите на Аматерското спортско здружение „Спорт во Ватикан“, кое ги собира спортистите кои работат во Римската курија и државата Ватикан. Папата ја спомена 50. годишнината од формирањето на фудбалското првенство на Ватикан во 1972 година, потсетувајќи на „1521 година, кога се одигра првиот натпревар на фирентинскиот фудбал, во дворот Белведере во Ватикан, во присуство на Лав X. Тоа е поврзаност со денешното здружение кое не треба да се заборави.
За време на разни натпревари, како кога патувате на добротворни настани, повикани сте да бидете сведоци на вашата поврзаност со Светиот Престол.
Потребно е здраво натпреварување
Светиот Отец потоа го истакна значењето на здравиот натпреварувачки дух како активност која може да придонесе за созревање на духот. Оттука произлегуваат трите правила, почнувајќи од тренингот, односно напор, пот и пожртвуваност, кои се показатели за страста кон спортот што го играте. Затоа е важно да спортувате со задоволство.
Ако постои такво однесување, натпреварувањето е здраво; во спротивно, доколку преовладуваат различни интереси, натпреварувањето се расипува, а понекогаш и се изопачува. Аматерството е клучно во спортот.
Дисциплина за изразување на најдоброто
Дисциплината – продолжи папата Фрањо – е аспект на образованието, формацијата. Дисциплина значи – објасни Папата – почитување на правилата, но и учење, растење, усовршување.
Токму тоа бара дисциплина, односно способност за контрола на самиот себе, да се поправи импулсивноста што ја имаме сите помалку или повеќе. Дополнително, дисциплината им овозможува на сите да ја играат својата улога, а тимот да биде тој што ќе го изрази она најдоброто во заедничка акција.
Спортот како метафора за животот
Последното правило е мотивацијата, внатрешната сила која дава поттик, која води до добар резултат.
Проверката не се заснова на резултати со броеви, туку на тоа колку бевме верни и доследни на нашиот повик; тука постои доследност – рече Светиот Отец и додаде: Зборувајќи за мотивацијата, би сакал да додадам нешто за вас кои сте ватикански спортисти: вашиот начин на тимска работа и соработка може да биде пример за работа во дикастериите и меѓу дикастериите во Куријата, како и во управите на државата Ватикан. Уште еднаш спортот е метафора за животот – рече на крајот папата Фрањо.
Ватикан њуз/к.мк
