Поздравувајќи ги ходочесниците од Фондацијата „Едит Хаберланд-Вагнер“ и од „Аугустинер-Бро“, папата Лав XIV размислуваше за августинската традиција на служење и потсети на повикот на папата Фрањо за одговорно управување со создадениот свет. Тој ги охрабри присутните мудро и праведно да ги користат даровите на созданието, заради мирот и општото добро.
Поздравувајќи ги ходочесниците од Фондацијата „Едит Хаберланд-Вагнер“ и од историската пиварница „Аугустинер“ во Минхен, папата Лав XIV се осврна на духовното наследство на августинската традиција и го обнови повикот на Црквата за одговорна грижа за создадениот свет.
Обраќајќи ѝ се на групата во сабота наутро во Ватикан, Светиот Отец им се заблагодари на ходочесниците што ја одбележале годишнината од неговиот избор на Петровиот престол со ходочестие во Рим, како и за нивната „молитвена поддршка“ на неговата служба.
Папата изрази благодарност и за подароците што ги донесоа претставниците на баварската пиварница, користејќи ја приликата да понуди две размислувања вдахновени од нивната историја и мисија.
Најнапред, потсетувајќи на историските врски на пиварницата со Августинскиот ред, папата Лав XIV го истакна големото лично значење што духовноста на свети Августин продолжува да го има во неговиот живот. Цитирајќи ја својата видеопорака од 2025 година до Августинската провинција „Свети Тома од Виланова“, тој рече дека свети Августин ги потсетува верниците дека „сите имаме дарови и таленти дадени од Бога, а нашата цел, исполнување и радост доаѓаат од тоа кога ги враќаме преку служење на Бога и на ближниот со љубов“.
„Laudato si’“
Папата Лав го насочи вниманието и кон енцикликата „Laudato si’“ на папата Фрањо, потсетувајќи дека Црквата неодамна ја одбележа првата годишнина од смртта на папата Фрањо. Тој се осврна на учењето на покојниот папа за „од Бога даденото величие на целото создание“, вклучувајќи ги храната и пијалакот што го одржуваат човечкиот живот.
Цитирајќи ја енцикликата, папата Лав XIV рече дека секое создание ја одразува Божјата љубов и дека „сè е, така да се каже, Божјо галење“. Тој додаде дека оваа свест го повикува човештвото на „голема одговорност“ да се грижи за созданието и да се осигури дека неговите ресурси се користат мудро и праведно.
„Правдата“, објасни Папата, „е предуслов за мир“.
Подоготвувајќи се да се вратат дома во Германија, Папата ги охрабри ходочесниците да продолжат да промовираат „праведен и ефикасен пристап кон грижата за созданието“, како во своите професионални активности, така и во личниот живот, секогаш заради општото добро.
Пиварницата „Аугустинер“ и Фондацијата „Едит Хаберланд-Вагнер“
Историјата на пиварницата „Аугустинер“ е тесно поврзана со августинските монаси од Минхен. Во 1328 година, августинските монаси почнале да произведуваат пиво во својот манастир во близина на Минхенската катедрала. Речиси пет века, монасите го произведувале и го продавале своето пиво директно од манастирската пиварница.
По секуларизацијата во 1803 година, баварската држава ја презела контролата врз манастирот, а пиварницата била приватизирана. Во 1829 година, претпријатието го купил пиварот Антон Вагнер од Фрајзинг, со што започнал непрекинат период на приватна сопственост што продолжува до денес.
Подоцна, Јозеф Вагнер, синот на Антон, изградил модерна пиварница на улицата „Ландсбергер“ во Минхен, каде што секоја капка пиво „Аугустинер“ се произведува од 1884 година.
Фондацијата „Едит Хаберланд-Вагнер“, основана од главниот наследник на пиварницата „Аугустинер“, промовира општествена одговорност преку иницијатива и претприемништво. Таа поддржува проекти што ја зачувуваат пиварницата „Аугустинер“ и овозможува широк спектар добротворни активности во области како што се заштита на спомениците, образование, развој на младите, уметност и култура, добротворна дејност, спорт, благосостојба на животните, животна средина и наука.
Ватикан њуз/к.мк
