Папата Лав XIV го слави својот 71. роденден на 14 септември 2026 година, по година обележана со повици за мир, апостолски патувања и грижа за човечкото достоинство.
Додека папата Лав XIV во понеделник, 14 септември, го слави својот 71. роденден, во Ватикан пристигнуваат пораки и честитки од целиот свет.
Претседателството на Италијанската бискупска конференција (CEI) испрати порака во која ги пренесува поздравите од локалните Цркви во Италија и му се заблагодарува на Папата за неговата служба.
Италијанските епископи потсетија на нагласувањето на папата Лав XIV дека Евангелието треба да биде основен приоритет на црковниот живот, а верата лична средба со Христос.
Тие го истакнаа и неговиот повик за мисионерски заедници, гостопримливи парохии и ефикасни структури на учество.
Осврнувајќи се на обраќањето на Папата по молитвата „Ангел Господов“ во неделата, Италијанската бискупска конференција ја нагласи врската меѓу простувањето и мирот, истакнувајќи дека конфликтите се раѓаат таму каде што нема помирување.
Година обележана со темата мир
Мирот беше една од најчесто повторуваните теми во зборовите на папата Лав XIV во текот на изминатата година.
Откако по својот избор зборуваше за „невооружен и разоружувачки“ мир, Папата постојано се враќаше на темите мир и помирување во своите апостолски патувања, средби и јавни обраќања.
Во текот на првата година од неговиот понтификат, тој се осврна на овие две теми повеќе од 400 пати, а често зборуваше и за единство, дијалог, надеж и човечко достоинство.
Неговото прво апостолско патување го однесе во Турција и Либан. Во Никеја, по повод 1700-годишнината од Првиот вселенски собор, тој го нагласи христијанското единство, додека во Либан се фокусираше на дијалогот и мирот.
Папата Лав XIV подоцна стана првиот понтиф што ги посетил Монако и Алжир. Во Анаба, древниот Хипон, посети места поврзани со свети Августин. За време на патувањето во Шпанија, стана првиот папа што се обратил пред шпанскиот парламент.
На 6 јануари тој ја затвори Јубилејната 2025 година, започната од папата Фрањо, со затворањето на Светата врата во базиликата „Свети Петар“.
Неговата прва енциклика, Magnifica humanitas, се осврнува на вештачката интелигенција и инсистира технологијата да остане во служба на човечкото достоинство, слободата, одговорноста и општото добро.
Тој ја заврши и Dilexi te, апостолскиот поттик започната од папата Фрањо за љубовта кон сиромашните. На оваа тема повторно се наврати и за време на својата посета на Лампедуза во јули и средбата со мигрантите.
Роден во Чикаго на 14 септември 1955 година, папата Лав XIV влегува во својата 72. година од животот со јасно препознатливи централни теми на својот понтификат: мир, единство и одбрана на човечкото достоинство.
Ватикан њуз/к.мк
