Папата им се заблагодари на верниците што ја поддржуваат неговата служба преку собирањето Петров денар
На празникот на светите Петар и Павле, заштитници на Рим, папата Лав XIV изрази благодарност за поддршката на верниците преку собирањето Петров денар и ги поздрави сите жители на италијанската престолнина.
Во понеделник, на 29 јуни 2026 година, на празникот на светите Петар и Павле, заштитници на Рим, папата Лав XIV упати поздрав до жителите на италијанската престолнина и им се заблагодари на верниците во светот што учествуваа во собирањето Петров денар.
„Денес го одбележуваме собирањето Петров денар. Искрено им благодарам на сите што со својата великодушност ја поддржуваат мојата служба како наследник на Петар. Да продолжиме заедно да чекориме во вера и заедништво“, рече Папата по молитвата Ангел Господов на плоштадот „Свети Петар“.
Ова собирање, кое се одржува секоја година, му овозможува на Папата да поддржува добротворни дела, да испраќа помош во случаи на катастрофи и да им помага на ранливите заедници низ светот.
Папата ги поздрави и жителите на Рим, на празникот на заштитниците на градот, истакнувајќи дека неговите мисли и молитви се особено со болните, осамените и затворениците.
„Им благодарам на паросите и на сите свештеници, монахињи и монаси што служат во Рим, бидејќи преку своето присуство и секојдневна служба го одржуваат живо неговото големо христијанско срце“, продолжи тој.
Благодарност до оние што придонесуваат за L’Osservatore di Strada
Папата ги поздрави и бездомните лица што тој ден беа на плоштадот „Свети Петар“ за да го делат L’Osservatore di Strada, додаток на L’Osservatore Romano.
Овој месечен додаток на ватиканскиот весник ги пренесува приказните, мислите и ставовите на најмаргинализираните и најранливите луѓе во општеството.
„Ви благодарам. И најдобри желби до сите што придонесуваат за овој весник.“
Рим ги слави своите заштитници
Папата Лав упати мисла и до сите што работат на различните настани што се одржуваат во градот по повод празникот на светите Петар и Павле.
Тој, меѓу другите, им се заблагодари на волонтерите на Pro Loco, локални организации што ги поддржуваат градовите и населените места низ Италија, кои ја украсија Виа дела Кончилијационе, долгата авенија што води кон плоштадот „Свети Петар“, со прекрасен цветен килим.
Секоја година, на 29 јуни, волонтерите на Pro Loco создаваат сложени цртежи и слики со цветни ливчиња. Ова е тринаесеттото издание на infiorata, што на италијански значи украсување со цвеќиња.
Папата им се заблагодари и на организаторите на „Girandola di Castel Sant’Angelo“, годишниот огномет што оваа година е посветен на свети Фрањо и неговата Песна на созданијата.
Втикан њуз/к.мк
