Пред враќањето од Кастел Гандолфо во Рим, Папата одговараше на прашања од новинарите пред Вила Барберини. Во врска со средбата со украинскиот претседател Зеленски, тој рече дека прашањето за репатријација на децата е во центарот на вниманието: „Тоа е бавен процес, зад сцената“. Тој повтори дека Светиот Престол е подготвен да обезбеди простор и услови за мировни преговори, а во врска со хипотетичкото патување во Киев, рече дека се надева, но и дека треба да се биде реалистичен.
Украина, војна, мировен план, улогата на Европа и можна посета на таа земја. Потоа преселување во Апостолската палата и посета на „Сината џамија“ на султанот Ахмед во Истанбул. Како и секој вторник, папата Лав XIV го заврши денот за одмор и работа во Кастел Гандолфо, 9 декември 2025 година, со средба со група новинари кои го чекаа пред Вилата Барберини. Тој одговори на прашања за актуелни теми, почнувајќи од средбата, во Кастел Гандолфо, со украинскиот претседател Володимир Зеленски. Главна тема е прашањето за војната, начините за постигнување договор и прекин на огнот. Разговаравме особено за прашањето за децата земени од нивната татковина и заробениците, и како Црквата може да помогне, особено во враќањето на децата во Украина – рече Папата.
Светиот Престол отворен за преговори
Тој повтори дека Светиот Престол е подготвен да обезбеди простор и услови за мировни преговори. Понудата досега не е прифатена, но ние сме отворени за барање решение и траен и праведен мир – истакна Светиот Отец. Што се однесува до повторената покана на претседателот Зеленски да ја посети Украина – „силен знак на поддршка за населението“, како што напиша претседателот на својот профил на платформата X – Папата одговори: „Се надевам, но не знам кога. Мораме да бидеме реални во врска со тоа, можеби ќе биде можно“.
Работа за враќање на украинските деца
Продолжувајќи со темата Украина, папата Лав XIV рече дека работата на Светиот Престол за репатријација на украинските деца е „за жал многу бавна“ и „се одвива зад сцената“. Затоа, претпочитам да не коментирам, туку да продолжам да работам на ова, за да можат овие деца да се вратат во своите домови, кај своите семејства – нагласи тој. Исто така не сакаше да коментира за мировниот план предложен од американскиот претседател Доналд Трамп бидејќи – како што рече – сè уште не го прочитал во целост. За жал, верувам дека некои делови од она што го видов носат огромен пресврт во традиционално силната соработка меѓу Европа и Соединетите Американски Држави.
Важната улога на Европа
Потоа Папата се осврна на улогата на Европа во мировниот процес, која Трамп ја доведе во прашање. Тој веќе ги искажа своите ставови за ова прашање во авионот враќајќи се од Бејрут по повод неговото неодамнешно апостолско патување. „Мислам дека улогата на Европа е многу важна и дека единството на европските земји е навистина значајно, особено во овој случај“, нагласи тој. „Барањето мировен договор без вклучување на Европа во преговорите е нереално. Војната се одвива во Европа и мислам дека, што се однесува до безбедносната гаранција што се бара денес и во иднина, Европа мора да биде вклучена“, рече папата Лав XIV и додаде: „За жал, не сите го разбираат ова, но мислам дека постои голема можност Европа да се обедини и заедно да бара решенија“.
Посета на Сината џамија во Истанбул
Беше дискутирано и за апостолското патување во Турција и Либан. На прашање на новинарите, Светиот Отец се осврна на неговата посета на Сината џамија во Истанбул, која ја помина „во тишина, во дух на концентрација и слушање, со длабоко почитување кон тоа место и верата на оние што се собираат таму да се молат“, како што објави Канцеларијата за печат на Светиот Престол тој ден. Новинарите прашаа зошто не се „молел видливо“, како што правеле неговите претходници. Кој рече дека не се молев? – одговори Папата. Рекоа дека не се молев, но јас веќе го дадов одговорот во авионот, ја споменав книгата („Вежбањето на присуството Божјо“, од брат Лоренс); можеби се молам токму во овој момент. Претпочитам да се молам во Католичка црква во присуство на Пресветата Олтарска Тајна – додаде папата Лав, забележувајќи дека е „интересно“ што е објавено за тој момент во џамијата.
Преселба во Апостолската палата
Конечно, меѓу полични прашања беше и едно за неговото преселување во Апостолската палата во Ватикан. Како што е познато, од денот на неговиот избор во конклавата, Папата живее во својот стан во зградата на Дикастеријата за наука на верата. Кога ќе се пресели во Папскиот стан и со кого? – беше прашањето. Сè уште нема датум, добро ми е таму каде што живеам сега, во Дикастеријата за наука на верата – одговори Папата, додавајќи дека неговите лични секретари моментално живеат со него: „Нема да има други“.
Ватикан њуз/к.мк
