Секретарот за односи со државите и меѓународните организации, надбискупот Пол Ричард Галагер, пристигна во Украина на 16 јули 2026 година, каде ќе престојува до 21 јули како пратеник на Папата. Повод за посетата е 35-годишнината од повторното воспоставување на структурите на Католичката црква од латински обред во земјата.
Неговата прва станица беше Лавов, каде што се сретна со надбискупот Мјечислав Мокржицки и со претставници на локалните власти. Во разговорите ја истакна потребата од враќање на мирот во Европа. Во вечерните часови отпатува за Киев, каде ќе се сретне со поглаварот на Украинската источно-католичка црква, Неговото Блаженство Свјатослав Шевчук.
Централната прослава ќе се одржи на 19 јули во светилиштето на Богородица од планината Кармел во Бердичив. Овој настан потсетува и на посетата на свети Иван Павле II на Украина во 2001 година.
Поради затворениот воздушен простор, надбискупот Галагер слета во Краков, Полска, од каде продолжи со автомобил заедно со апостолскиот нунциј во Киев, надбискупот Висвалдас Кулбокас. По преминувањето на границата кај Краковец, каде чекањето може да трае со часови, делегацијата беше пречекана од украинскиот амбасадор при Светиот Престол, Андриј Јураш.
Во Лавов, надбискупот Галагер се сретна со локалните власти и нагласи дека „праведен крај на војната значи враќање на мирот во овој дел од Европа“. Тој додаде дека Црквата не ги заборава страдањата на украинскиот народ и дека е неопходно да се создадат услови за праведен мир.
Во 9:00 часот беше одржан момент на молитва и молчење за жртвите од војната, практика што се спроведува низ цела Украина од 2022 година.
Потоа, надбискупот го посети Католичкиот универзитет во Лавов, каде студентите учат и покрај воените услови. Универзитетот располага со засолништа за време на напади и активно помага на заедницата. Иако не бил директно погоден, кампусот се наоѓа во близина на бомбардирања, при што загинале повеќе лица поврзани со институцијата.
Претседателот на универзитетот, митрополитот Борис Гудзијак, истакна дека „војната е тука“, но и дека студентите добиваат образование кое ги учи на солидарност и помош кон другите. Универзитетот обезбедува и поддршка за лица со попреченост, кои се активно вклучени во неговиот живот.
Во вечерните часови, по посетата на црквата „Свети Иван Павле II“ во Ривне, надбискупот Галагер во Киев се сретна со надбискупот Свјатослав Шевчук.
Ватикан њуз/к.мк
