Сакам ова размислување да го изразам од позиција на верата, бидејќи верата треба да се живее. Таа не се разбира само преку теолошки трактати, туку пред сè преку самото искуство на верата, искуство што го допира животот. Денес тоа претставува нов начин на живеење на духовноста.
Кризата на верата денес
Денес гледаме дека кризата на верата и довербата не е ограничена само на религијата, општеството или економијата. Забележувам дека многу луѓе, иако имаат многу причини за благодарност, поминуваат низ моменти на мака. Го губат својот мир поради проблеми што ја потресуваат нивната вера или поради економски и семејни кризи што ги наведуваат да се сомневаат во Бога.
Целта на искуството на верата
Ова размислување има една цел. Тоа не е само да понуди совети и насоки, туку да го постави прашањето која е целта на верата.
Сум забележал дека луѓето кои активно учествуваат во некое црковно движење често стануваат добри водачи. Со својата дарежливост им помагаат на многумина, а истовремено добро ги користат своите ресурси, таленти и дарови, за да создаваат повеќе благословени дела и великодушно да им служат на најблиските, на своето семејство, пријателите и заедницата во која живеат и работат.
Како делува Бог
Тоа е прашање што често си го поставувам. Верувам дека во последниве денови тоа прашање ме допре во најдлабокиот дел од срцето.
Размислував за Божјите знаци во нашата стварност и за тоа дека нашата лична историја носи траги од Бога. Понекогаш тие траги се замаглени од текот на времето, а понекогаш се појасни. Но, тоа е истиот Бог, Кој дејствува во животот на секој човек. Ништо не останува надвор од Неговото делување.
Каде делува Бог
Бог делува во создадениот свет, во секојдневието, во природата, во личната историја, во историјата на нашите народи и во секојдневната борба на секој човек што има животна цел.
Таа цел треба да Му дозволи на Бога да зборува, бидејќи, како што вели Евангелието, „ако тие замолкнат, камењата ќе повикаат“ (Лука 19,40). Самото создание ќе ја објави Неговата порака и Неговата слава, зашто доаѓањето на Исус и божествената вистина не можат да бидат запрени со човечкото молчење.
Бог пишува право и по искривени линии. Оваа изрека, која често ѝ се припишува на света Тереза Авилска, изразува голема вистина. Бог може да го исполни Својот план дури и преку човечките несовршености и низ хаотичните настани во животот.
Никогаш не се откажувај во животот
Бог секогаш излегува како победник. Можеме да Го предизвикуваме Бога, да викаме или да посакаме да се откажеме од животот, но Бог секогаш нè вознемирува на спасоносен начин. Нè потресува, нè изместува од нашата лажна сигурност и нè повикува да излеземе од рамнотежата на која сме се навикнале. Тоа е Божјото дело во животот на секој од нас.
Накратко, верата е чин на волјата. Таа е почетна точка од која човек го прави чекорот, односно скокот. Тоа е скок за надминување на стравовите и вознемиреноста. Тоа не е скок во празнина, туку ризик преку кој човек тргнува во потрага по нешто подобро.
Вилсон Х.С.Л./к.мк
