Бројот на загинати од двете разорни свлечишта во зоната Гофа во јужна Етиопија продолжува да расте, додека на настраданото население очајно му е потребна хуманитарна помош.
Извори од локалната црква потврдија за агенцијата Фидес дека хуманитарната ситуација во регионот е критична. Во писмото упатено до населението во зоната Гофа, претседателот на Епископската конференција на Етиопија, кардинал Демерју Сорафиел, ја опиша катастрофата како трагична, изразувајќи „искрено сочувство“ до епископите за загубата на нивните најблиски и уверувајќи во „непоколебливата поддршка“ на Црквата во Етиопија на сите кои се погодени.
И покрај тешките услови на теренот, Католичката црква во Етиопија преку своите институции и во соработка со властите и другите хуманитарни организации ги интензивира напорите за давање помош. Приоритет се активностите за спасување животи, како што се обезбедување итна медицинска помош и учество во потрагата и спасувањето на исчезнатите лица.
Покрај материјалната помош, локалната црква обезбедува и советодавни услуги за да им помогне на жртвите да се справат со траумата и стресот од ситуацијата. Во својата порака, кардиналот Сорафиел ги повика сите католици и луѓе со добра волја во земјата на било кој начин да им помогнат на оние на кои им е потребна помош.
Јужна Етиопија беше погодена од обилни дождови и поплави во последните месеци. Додека обилните врнежи се предизвикани од голем број фактори, климатските промени ја зголемуваат веројатноста за смртоносни поплави, што резултираат со лизгање на земјиштето. Првото лизгање на земјиштето беше предизвикано од обилните дождови на 21 и 22 јули, а второто ги погоди оние што се собраа да спасуваат луѓе.
Канцеларијата на Обединетите нации за координација на хуманитарни прашања соопшти дека бројот на загинати во четвртокот се искачил на 257, но се очекува конечниот број на загинати да надмине 500, бидејќи тимовите за пребарување продолжуваат да копаат за да пронајдат стотици исчезнати.
Ватикан њуз/к.мк
