Изнесувајќи ја својата вообичаена катехеза за неделното евангелие, папата Фрањо зборуваше за Исусовата парабола за трговецот кој барал скапоцен бисер. „Тој најде скапоцен бисер, отиде, продаде сè што имаше и го купи“ (Матеј 13,46).
Папата потоа ги опиша трите гестови на трговецот кои можеме да ги примениме и во нашите животи: прво тој бара, потоа го наоѓа и на крајот го купува скапоцениот бисер.
Барајте со љубопитност
Првиот гест: е да се бара. Станува збор за претприемнички трговец кој не мирува, туку ја напушта куќата и тргнува во потрага по скапоцениот бисер. Трговецот не вели: „Доста ми е од овие што ги имам“, туку бара нешто поубаво. Тоа е повик до нас да не се затвораме во рутината, во просечноста на оние кои веќе не тежнеат кон ништо, туку да ја оживееме желбата, бидејќи желбата за барање, за напредок не смее да згасне, објасни Папата во своето обраќање.
Тоа е повик за нас да негуваме соништа за добро, да ја бараме Господовата новост, бидејќи Господ не се повторува, тој секогаш носи новост, новоста на Духот, секогаш создава нови реалности на животот. Сите мора да имаме таков став: барајте, истакна Римскиот епископ.
Имајте остри очи
Вториот гест на трговецот е: да најде. Тој е остроумен човек, кој „има око“ и знае да препознае бисер со голема вредност. Тоа не е лесно, истакна Папата.
Тој го спореди со лице кое минува низ прекрасна ориентална чаршија исполнета со најразлична роба, внимателно испитувајќи и распознавајќи се што е изложено.
Папата рече дека таквиот методичен процес на внимателно расудување ни нуди да научиме да правиме разлика помеѓу она што е добро и скапоцено.
Тој нагласи дека треба да го бараме она што е важно и скапоцено за нашите животи, да ја развиеме вештината на препознавање на скапоцениот накит на животот и да го разликуваме од бижутеријата.
Да не губиме време и слобода на безначајни работи, на забави кои ги оставаат празни срцата, додека животот секој ден ни нуди скапоцен бисер на средба со Бога и со другите! Потребно е да се знае како да се препознае: да се дешифрира што е што за да се најде, им порача папата Фрањо на насобраните верници.
Да се прифати откритието
Папата потоа го опиша последниот гест: купување на бисерот. Сфаќајќи ја нејзината огромна вредност, тој продава сè, ги жртвува сите добра само за да го добие. Радикално го менува својот магацински инвентар; не му остана ништо друго освен тој бисер: тоа е неговото единствено богатство, смислата на неговата сегашност и неговата иднина.
Ова е повик за нас, продолжи Светиот Отец истакнувајќи: Но, каков е тој бисер за кој човек може да се откаже од се, за кој ни зборува Господ? Тој бисер е Тој Самиот, тој бисер е Господ! Барање на Господ и пронаоѓање на Господ, средба со Господ, живеење со Господ. Тој бисер е Исус: Тој е скапоцениот бисер на животот, кој треба да се бара, пронајде и стекне, рече Светиот Отец.
„Ако го сретнеш Христос, тој го менува животот“.
Крајното Добро на животот
Сумирајќи ги трите гестови на мудриот трговец, Папата рече дека треба да се запрашаме што навистина бараме во животот и дали се трудиме да го бараме Бога и да правиме добро.
Потоа предложи да учиме како да препознаваме што е навистина добро и што доаѓа од Бог, а што нè остава празни.
Папата предложи да погледнеме во нашите животи и да се запрашаме дали сме се откажале од се за да го направиме Господ центар на нашите животи, нашето најголемо добро сега и секогаш.
На крајот, се помоли за благодат од Пресвета Богородица за да ни помогне да го бараме, пронајдеме и сесрдно да го прифатиме Господ во нашите животи.
Молитви за Светскиот ден на младите
По завршувањето на молитвата на Ангел Господов, Папата ги замоли сите присутни да го следат со нивните молитви на неговото патување во Португалија, кое започнува во среда, 2 август, каде што ќе претседава со прославата на Светскиот ден на млади во Лисабон.
„Ве молам следете ме со вашите молитви на моето патување во Португалија по повод Светскиот ден на млади, на кое ќе заминам во среда. Многу млади луѓе, од сите континенти, ќе ја доживеат радоста на средбата со Бога и со своите браќа и сестри, водени од Дева Марија која по објавувањето „стана… и побрза“ (Лука 1,39). На неа, блескавата ѕвезда на христијанскиот пат, која многу се чествува во Португалија, и ги доверувам ходочасниците на Светскиот ден на млади и сите млади луѓе во светот“.
Ватикан њуз/к.мк
