Папата Лав XIV издаде рескрипт со кој ефикасно го сместува Папскиот комитет за Светскиот ден на децата во рамките на Дикастеријата за лаици, семејство и живот.
Од организација директно под надлежност на Папата, Папскиот комитет за Светскиот ден на децата – основан минатата година од папата Фрањо за организирање и координирање на „Светските ден на децата“ – сега е под надлежност на Дикастеријата за лаици, семејство и живот.
Оваа одлука ја донесе папата Лав XIV по аудиенцијата со заменик секретарот на секретаријатот на државата, надбискупот Едгар Пења Пара, на 6 август, и беше објавена во Рескрипт.
Во документот – објавен во среда, но со дата од сабота, 9 август – е наведено дека: „Оваа одредба треба да им се соопшти на двете засегнати институции за да можат да го спроведат процесот на транзиција“.
Основан во 2024 година
Папата Фрањо, на 20 ноември 2024 година, го основа – преку хирограф – Папскиот комитет за Светскиот ден на децата, давајќи му ја мисијата да го надгледува „црковното анимирање и пасторалната организација на Светскиот ден на децата“.
Овој настан, поттикнат од Светските денови на младите (WYD), има за цел да ги собере децата од целиот свет на средба на вера, музика и сведоштва.
Првото издание се одржа на 25 мај 2024 година, на Олимпискиот стадион во Рим, во присуство на папата Фрањо, и на него учествуваа над 50.000 деца и малолетници, вклучувајќи многумина од конфликтни зони.
Пасторална работа со деца
Во истиот основачки хирограф се истакнува дека Папскиот комитет е одговорен за координирање и промовирање на иницијативите од националните и регионалните организациски комитети, како и за соработка со пасторалните канцеларии на локалните цркви и бискупските конференции, за да се осигури дека Светскиот ден на децата нема да биде изолиран настан.
Цел е пасторалната грижа за децата сè повеќе да биде приоритет во Црквата.
На почетокот на февруари 2025 година, Комитетот организираше и состанок во Апостолската палата во Ватикан насловен како „Сакајте ги и заштитете ги“, фокусиран на продлабочување на дискусијата за правата на малолетниците, кои се сè повеќе експлоатирани и злоупотребени.
Дикастерија за лаици, семејство и живот
Сега, целата структура на Комитетот се пренесува во Дикастеријата, чиј мандат вклучува прашања поврзани со лаиците и семејството, а кој природно се протега на пасторалната грижа и внимание кон децата.
Токму оваа иста Дикастерија, моментално предводена од кардиналот Кевин Џозеф Фарел, ги организира и Светските денови на млади (WYD), кои првично беа координирани од „Младинскиот оддел“ на сега веќе непостоечкиот Папски совет за лаиците.
Тој Совет беше вклучен во сегашниот Дикастерија во 2016 година, како дел од реформата на Римската курија од страна на папата Фрањо.
Ватикан њуз/к.мк
