Именденот на Папата
Црквата на 23 април го слави свети Ѓорѓи и тоа на посебен начин, бидејќи воедно слави и именден на Хорхе Марија Берголио, на папата Фрањо. По тој повод за Радио Ватикан зборуваше монсињор Гилермо Кархер, еден од најблиските соработници на папата Фрањо.
Црквата денес го слави свети Ѓорѓи и тоа на посебен начин, бидејќи воедно слави и именден на Хорхе Мариа Берголио, на папата Фрањо. По тој повод за нашето радио зборуваше монсињор Гилермо Кархер, свештеник од Аргентина и папски церемонијар, еден од најблиските соработници на папата Фрањо, со кој е поврзан повеќе од 20 години.
Кога размислувам за Папата и го гледам како работи, можам да кажам дека тој е „модерниот свети Ѓорѓи“ во смисла дека е голем борец против силата на злото во вистински христијански дух – рече монсињор Гилермо, додавајќи дека „во него го гледа Христос кој сее добро за да се бори против злото“. Во тоа е примерот бидејќи – како што посведочи – тоа го правел уште во Буенос Аирес и продолжува тоа да го работи во својата карактеристична едноставност.
На коментар дека во Аргентина и како кардинал се преставувал со „татко Хорхе“, но и како папа има многу силна димензија на свештеничко татковство, монсињор Гилермо ја истакна близината и познавањето со верниците во Аргентина кои што Папата на средбите го поздравуваале со „падре Хорхе“ и потсети дека во Буенос Аирес ги посетувал најсиромашните места на градската периферија каде што луѓето ги поздравувал со насмевка, прегратка и татковски поглед.
На забелешка дека Папата ужива голема популарност, но и дека не изостануваат ниту критиките – па дури и од католичкиот свет – и одговарајќи на прашање дали некогаш забележал дека тоа го ражалостува, папскиот церемонијар рече дека таквите случаеви ретко ги коментира, но ги прифаќа со насмевка, слободен дух и внатрешна сила. Мислам дека тоа е дар на Светиот Дух – додаде: тој истрајува во својата служба за доброто на Црквата и светот и тоа го прави мирно и со внатрешна сигурност.
Монсињор Гилермо потоа истакна дека папата Фрањо е човек „кој поседува голема духовност“ и дека е човек на молитва: секој ден, наутро веднаш штом стане посветува два часа на молитва и размислување. Освен тоа, на церемониите во сакристијата се гледа разлика пред и после Литургијата – рече и објасни:
Со задоволство ги поздравува сите богослови и министранти, но кога ќе се облече во литургиската облека се променува и го гледаме како човек на молитва, како човек кој е концетриран на евхаристиското таинство кое што го слави. Тоа е пример и за свештениците: ние сме со народот, но кога треба да бидеме со Бог, тогаш сме со Бог – рече монсињор Гилермо.
На забелешка дека кардинал Џивиш речиси со истите зборови го опишувал свети Иван Павле II додека бил негов секретар, аргентинскиот свештеник рече дека тоа им е заедничко: да бидат во Божјото присуство, што силно се манифестира во одредени моменти. На прашање што би посакал Папата за неговиот именден монсињор Гилермо рече: Да продолжи да биде тоа што навистина е во својата доследност и транспарентност, бидејќи така прави многу добрина.
РВ/Д.И.
