На 30 мај 2025 година ќе започне во Рим Јубилејот на семејствата, децата, бабите и дедовците, на кој ќе присуствуваат над 60.000 верници од 120 земји на тридневна молитва и бројни настани.
На големиот настан по повод Јубилејот, кој ќе се одржи од 30 мај до 1 јуни 2025 година ќе присуствуваат ходочесници од сите континенти, а особено големи групи се очекуваат од Италија, Шпанија, САД, Полска и Португалија. Меѓу учесниците ќе бидат претставени бројни епархии, здруженија и движења.
„Дијалози со градот“ – културни, уметнички и духовни настани
Првиот ден од Јубилејот, 30 мај, од 8:00 до 17:00 часот, ќе биде посветен на ходочестие на Светите Врати во Папските базилики. Во 10:00 часот ќе започнат традиционалните „Дијалози со градот“ – културни, уметнички и духовни настани на плоштадите во историскиот центар на Рим.
Во сабота, на 31 мај, ходочестието на Светите Врати ќе продолжи во истиот временски период од 8:00 до 17:00 часот, но Светата Врата на Ватиканската базилика ќе биде затворена од 8:00 до 14:00 часот од организациски причини.
„Прослава на семејството“ со музика и сведоштва
Кулминацијата во саботата ќе биде „Почитување на семејството“ и молитвеното бдение на Плоштадот Свети Иван Латерански од 18:30 до 20:00 часот, каде што ќе се моли Бројаница, со што ќе заврши месецот посветен на Дева Марија. Вечерта ќе ја води познатата италијанска ТВ водителка Лорена Бјанкети, а ќе учествуваат актерот Џовани Сифони, христијанските музички групи „The Sun“ и „Gen Verde“, како и младиот саксофонист Алфио Русо.
За време на настанот, Папската фондација „Помош за црквата во неволја“ ќе подели 10.000 примероци од новото издание на „Детската Библија“ на пет јазици: италијански, англиски, шпански, француски и португалски.
Света Литургија со Папата на плоштадот „Свети Петар“
Јубилејот на семејствата ќе заврши во недела, на 1 јуни, со света Литургија на плоштадот „Свети Петар“, која ќе ја предводи папата Лав XIV, а ќе започне во 10:30 часот. Учеството е бесплатно и не се потребни билети, соопшти прес-службата за Јубилејот 2025.
Ватикан њуз/к.мк
