Светиот Престол предупреди дека попречувањето на помошта за Газа е сериозно кршење на хуманитарното право
Постојаната набљудувачка мисија на Светиот Престол при Обединетите нации во Њујорк, во изјава до Генералното собрание, ја повтори својата финансиска поддршка за Агенцијата на ОН за палестинските бегалци на Блискиот Исток, која повеќе од 70 години обезбедува образование, здравствена заштита и социјални услуги, нудејќи можност за достоинствен живот. Светиот Престол изрази и длабока загриженост поради убиството на хуманитарни работници.
Попречувањето на дистрибуцијата на хуманитарна помош за палестинските бегалци на Блискиот Исток претставува „тешко кршење на меѓународното хуманитарно право“ и дополнително ги влошува страдањата на луѓето што веќе живеат во исклучително несигурни услови.
Ова го повтори Постојаната набљудувачка мисија на Светиот Престол при Обединетите нации во Њујорк, во изјава прочитана на 30 јуни за време на состанокот на надлежниот комитет на Генералното собрание.
Суштинска поддршка за Палестинците повеќе од 70 години
Во својата изјава, ватиканската делегација го нагласи значењето на Агенцијата на Обединетите нации за помош и работа за палестинските бегалци на Блискиот Исток, УНРВА, истакнувајќи дека нејзината работа претставува суштинска поддршка за милиони палестински бегалци.
Повеќе од седум децении, како што се наведува во изјавата, Агенцијата обезбедува образование, здравствена заштита, помош во храна и социјални услуги, нудејќи заштита, поддршка и можност за достоинствен живот.
УНРВА е основана во 1949 година од Генералното собрание на Обединетите нации со Резолуцијата 302, по Арапско-израелската војна од 1948 година, со цел да им помага на палестинските бегалци.
Претставништвото на Светиот Престол при ОН изрази и „длабока загриженост“ поради убиството на членови на персоналот на УНРВА, како и поради нападите врз објекти на Агенцијата на териториите на Државата Палестина, вклучувајќи училишта и други објекти во кои цивили побарале засолниште.
Финансиска поддршка од Светиот Престол
Признавајќи ја неопходноста од поддршката што ја обезбедува УНРВА, Светиот Престол ја потврди својата финансиска посветеност на Агенцијата, како конкретен израз на солидарност со палестинските бегалци и доверба во нејзината хуманитарна мисија.
На крајот, Светиот Престол изрази надеж дека работата на УНРВА секогаш ќе се спроведува со цврсто почитување на принципите на хуманост, неутралност, непристрасност и независност.
Таквиот пристап, се наведува во изјавата, е неопходен за да се зачува кредибилитетот на Агенцијата и за да се обезбеди таа да го исполнува својот мандат како сигурен инструмент на солидарност и мир.
Ватикан њуз/к.мк
