Прославен празникот Духови во Скопската Катедрала „Пресвето Срце Исусово“

Прославен празникот Духови во Скопската Катедрала „Пресвето Срце Исусово“

На празникот Духовден, 23 мај 2021 година, Н.В.П. монс. Киро Стојанов, во сослужение на скопскиот катедрален парох дон Паво Шекерија и о. Марјан Ристов, канцелар, служеше света понтификална Миса во Катедралата „Пресвето Срце Исусосо“ во Скопје, а воедно подели и света Тајна Потврда на г-ѓа Лилјана.

Во својата проповед рече: Драги браќа и сестри, од библиските читања слушнавме за невообичаени појави на денот на првиот Духовден: татнеж на ветрот во салата, пламен во форма на јазици над главите на апостолите, чудесно познавање на непознати јазици, чудење на собраниот свет и потсмев. Сето ова најави и објави невидлив настан: доаѓање и присуство на Светиот Дух, кој на необичен начин ги исполни душите на апостолите и заедниците собрани со нив.

Но, да обратиме внимание на суштината: Исусовите ученици и првата христијанска заедница се наоѓаат заедно; собрани и обединети во љубов и молитва, тие очекуваат да се исполни Исусовото ветување: да бидат „крстени со Светиот Дух“, за да може да бидат негови сведоци „до краиштата на земјата“. Само Светиот Дух – Утешител и Бранител, ќе ја претвори оваа мала, исплашена заедница во жива, бестрашна Црква, сведок на Исусовото дело и живот.

„И сите се исполнија со Дух Свети“ пишува во Делата апостолски за првите христијани. Сепак, тоа е напишано за сите христијани и за нас денес. Црквата е за секој; Светиот Дух е ветен на сите: на целата Црква и на сите во Црквата. Затоа ниту нашиот денешен празник – Духови – не е само споменден-годишнина од првите чудесни Духови туку многу повеќе: повторување, наше лично оживување и доживување на тој настан. Духови, имено, се трајно доживување на Црквата: таа е тело што расте и се храни со силата на Светиот Дух; зграда што Тој ја изградува и доградува: Духови се секој ден.

„И не оскрбувајте Го Светиот Дух Божји со Кој сте запечатени за денот на откупувањето“ (Еф 4,30). Божја сме сопственост, запечатени со Свтиот Дух; денес треба особено да го запомниме тоа и да ја продуховиме и освежиме нашата душа и нашето христијанство. Свесни за оваа голема вистина, ние треба да се стремиме многу сериозно и секој ден ова тело – наше и на нашата Црква – да биде што е можно поздраво и посвето; и што е можно помалку да го жалостиме Светиот Дух, истакна бискуп Стојанов.

Категорија: Вести, Македонија

За авторот