Промоција на книгата „Благородното дело на отец Јосиф и сестра Еврозија Алоати“ во Струмица
Во среда 16 ноември 2016, пред бројната публика во струмичката Катедрална црква „Успение на Пресвета Богородица“, се одржа промоција на книгата „Благородното дело на отец Јосиф Алоати и на сестра Еврозија Алоати“ од д-р Иван Драгов.
На промоцијата во Струмица која се случи само една седмица по онаа во Скопската катедрала, пред централно поставените портрети на братот и сестрата Алоати, исто како и во Скопје, гостите ги поздрави и им посака добредојде на присутните и на учесниците Провинцијалната сестра Стефанија Георгиева.
Вечерта започна со книжевно музички блок, чии продолженија естетски ја обликуваа вечерта во која двете промоторки ги презентираа своите излагања.
Првата промоторка, проф. д-р Виолета Мартиновска истакна: „Цел живот да се посвети на Бога, не е така едноставно. Но, кога тоа се прави со многу љубов, посветеност, тогаш има светлосни резултати. Всушност, сестрите Евхаристинки тоа го потврдуваат, ги докажуваат, ги живеат двете најголеми христијански заповеди: Сакај го Бога со сето свое срце и втората заповед: Сакај го ближниот како себе си. Во овие две заповеди, се наоѓа суштината на високо, етичниот живот и целосна посветеност на верата и ближниот. Се чини, сѐ додека постојат молитвите, ќе постои светот.“
Втората промоторка, госпоѓа Катица Трајковска Абјаниќ забележа: „Оваа возбудлива сторија базирана врз документи, историски факти, писма, лични искажувања и сведочења е пред се книга за братот и сестрата кои одговориле на Божјиот повик и во името на таа неизмерна љубов кон Троединиот Бог и кон откупителната жртва на господ Исус Христос по Божја промисла пристигнале во Македонија. Тука го научиле јазикот и го засакале населението. Отец Јосиф како свештеник лазарист кој со одобрение на Рим, го прифатил источниот обред на црковно служење, а сестра Еврозија основала првата монашка заедница на чесни сестри во Македонија- Евхаристинки, наречени така од преголемата љубов на Исус во светата евхаристија.“
Потоа следеше излагањето на преведувачката на книгата сестра Татјана Атанасова која зборувајќи за овој голем предизвик рече: „Имав голема желба книгата да биде преведена на современ македонски јазик за да може секој да ја прочита и да се збогати читајќи и размислувајќи за животот и делувањето на нашите, за мене свети основачи отец Јосиф Алоати и сестра Еврозија Алоати. На почетокот ме охрабри веќе покојната сестра Маргарита Јорданова велејќи ми дека можам тоа да го сторам. Кога го завршив преводот се обратив за лекторирање кај проф. д-р Јадранка Владова, сега покојна, ми рече дека со задоволство и љубов ќе направи сѐ што треба и навистина така беше. Таа ја лекторираше книгата, иако веќе беше тешко болна.“
На крајот од вечерта на присутните .длабоко трогнат им се обрати парохот на црквата „Успение на Пресвета Богородица“ отец Ггеори Трајков, кој рече дека имал можност да се сретне со современици на отец Јосиф и сестра Еврозија, основачите на монашката заедница на Сестрите Евхаристинки и дека е пресреќен бидејќи книгата за овие свети служители на Христа конечно е преведена на современ македонски јазик.
Во веќе спомнатата книжевно музичка содржина свој вдахновен придонес дадоа Марија Докузова – клавијатури, Серафина Фантаузо-сопран, Евгенија Трајкова – флејта, Благица Калева и Трајче Георгиев – дует. Делови од книгата читаа актерката и актерот од Струмичкиот театар, Анкица Бенинова и Никола Черкезов, а вечерта ја водеше Ѓорги Калајџиев, од струмичката телевизија ВИС.
к.мк/К.Т.А
Не е дозволено преземање на оваа содржина или делови од неа за понатамошно користење во печатена, дигитална или било која друга форма за умножување без писмена дозвола од редакцијата на Католици.мк
