На светата Литургија за Јубилејот на семејствата, децата, бабите и дедовците и старите лица, Папата потсети на „универзалното единство на семејството“ кое е „знак на мирот“ и „иднина на народите“: понекогаш човечноста е предадена, „на пример, секој пат кога се повикува на слободата не за да се даде живот, туку за да се одземе, не за да се помогне на друг, туку за да повреди“
„На денешниот свет му е потребен брачниот завет за да ја запознае и прифати Божјата љубов и, преку нејзината обединувачка сила, да ги надмине силите што ги уништуваат односите во општеството“, рече папата Лав XIV. во проповедта на светата Литургија, која ја служеше во недела 1 јуни 2025 година на плоштадот Свети Петар повод Јубилејот на семејствата, децата, бабите и дедовците и старите лица.
Својата проповед Папата ја започна со Евангелието навестено на светата Литургија, нагласувајќи дека „го примивме животот пред да го посакаме. Не само тоа. Штом се родивме, ни беа потребни други за да живееме, не можевме да го направиме тоа сами: некој друг нè спаси, се грижеше за нас, за нашето тело и за нашиот дух. Сите ние живееме, значи, благодарение на односот, односно слободната и ослободителна врска на човечноста и меѓусебната грижа“.
Вистина е дека понекогаш таа човечност, тоа човекољубие, е предадено и разочарано. На пример, секој пат кога се повикува на слободата, не за да даде живот, туку за да се одземе, не за да се помогне на друг, туку за да повреди. Но, дури и кога е соочен лице в лице со злото, кое се спротивставува и убива, Исус продолжува да се моли на Отецот за нас, а неговата молитва делува како мелем за нашите рани, станувајќи за сите навестување за простување и помирување.
„Тука сме за да бидеме едно како што Господ сака да бидеме едно, во нашите семејства и каде и да живееме, работиме и учиме: различни сме, а сепак сме едно, многумина сме, а сепак сме едно, секогаш, во секоја околност и на секоја возраст од животот“, рече папата Лав XIV. додавајќи: „Ако се сакаме еден со друг на овој начин, врз темелот, кој е Христос, кој е Алфа и Омега, почеток и крај, ќе бидеме знак на мир за сите, во општеството и во светот“.
Продолжувајќи ја својата проповед, Папата потсети дека во последните децении неколку сопружници се прогласени за блажени и светци, не поединечно, туку токму како брачна двојка, нарекувајќи го тоа „знак што дава радост и во исто време нè охрабрува да размислуваме“. Тој ги спомена Света Луиза и Зели Мартин, родителите на Света Тереза од Детето Исус, блажените Луиџи и Марија Белтраме Кватроки од Рим, но и полското семејство Улма: родители и деца обединети во љубов и мачеништво:
Покажувајќи на брачните двојки како пример за сведоци, Црквата ни кажува дека на денешниот свет му е потребен брачниот завет за да ја запознае и прифати Божјата љубов и, нејзината сила што обединува и помирува, да ги надмине силите што ги уништуваат односите и општествата. Затоа, драги сопружници, со срце полно со благодарност и надеж, ви велам: бракот не е идеал, туку мерка за вистинската љубов помеѓу мажот и жената – љубов која е целосна, верна и плодна. Како што ве обединува во едно тело, истата таа љубов ве прави способни, според Божјиот образ, да давате живот.
Папата им се обрати на родителите и децата:
Ве охрабрувам да бидете примери за доследност за вашите деца, однесувајќи се онака како што сакате тие да се однесуваат, воспитувајќи ги за слобода преку послушност, секогаш барајќи го во нив доброто и средствата да се зголемуваат. И вие, деца, бидете благодарни на вашите родители: искажувајте „благодарам“ за дарот на животот и за сè што ни дава секој ден е првиот начин да ги почитувате вашите татко и мајка.
Обраќајќи им се на бабите и дедовците и на постарите лица на крајот, Папата топло им препорача да се грижат за оние што ги сакаат со мудрост и сочувство, со понизност и трпение што ги носи со себе седата коса. „Во семејството, верата се пренесува заедно со животот, од генерација на генерација: се споделува како храна на трпезата и чувствата на срцето. Ова го прави семејството привилегирано место за средба со Исус, кој нè сака и секогаш ни посакува добро“, рече Папата на крајот од својата проповед на Светата Литургија за Јубилејот на семејства, деца, баби и дедовци и стари лица.
Ватикан њуз/к.мк
