Папата: Ја чувствувам поддршка од сите. Се молам за мир, од тука војната е уште поапсурдна.
Ја чувствувам сета ваша љубов и близина и во овој посебен момент се чувствувам како да ме носи и поддржува целиот Божји народ“, истакнува папата Фрањо во пладневното обраќање во недела 2 март 2025 година. Вообичаената катехеза на Папата пред молитвата Ангел Господов во целост ја објави Канцеларијата за печат на Светиот Престол, со оглед на тоа што Светиот Отец се уште се наоѓа на лекување во поликлиниката „Гемели“.
Толкувајќи го евангелскиот дел од неделната Литургија, Папата нагласува дека Исус не повикува да размислуваме за две од петте сетила: видот и вкусот. „Во врска со видот, нè повикува да ги научиме очите да го гледаат доброто во светот и да им судиме на нашите ближни со љубов. Тој вели: „Извади ја најнапред гредата од своето око, па тогаш ќе видиш како да ја извадиш раската од окото на брата си“ (Лука 6,42). Само со таков поглед полн со нежност, а не со осуда, братското поправање станува крепост. Оти ако не е братско, не е ни поправање! – предупредува Светиот Отец.
Кога станува збор за вкусот, Папата ги спомнува Исусовите зборови дека „секое, пак, дрво се познава според својот плод“ (Лука 6,44). Плодовите што ги носиме како луѓе, на пример, се наши зборови, така што „од преполнето срце зборува устата“ (Лука 6,45). „Лошите плодови се насилни, лажни и вулгарни зборови; Добрите плодови се правични и искрени зборови кои даваат вкус на нашите разговори. Затоа, можеме да се запрашаме: како гледам на другите луѓе, на моите браќа и сестри? И како се чувствувам кога ќе ме погледнат? Дали моите зборови имаат добар вкус или се полни со горчина и суета, прашува Папата во својата порака.
На крајот, тој додава дека повторно ги испраќа своите мисли од болницата, каде што е веќе неколку дена, опкружен со лекари и здравствени работници, на кои им се заблагодарува за вниманието со кое се грижат за него: „Во срцето го чувствувам благословот што се крие во слабоста, бидејќи токму во овие моменти учиме уште повеќе да му веруваме на Господ“. Во исто време, му благодарам на Бога што ми даде можност да ја споделам со телото и духот состојбата на многу болни и напатени луѓе“.
Светиот Отец на сите им се заблагодари за молитвите кои се издигнуваат до Господа од срцата на многубројните верници од различни делови на светот: „Ја чувствувам сета ваша љубов и близина и во овој посебен момент се чувствувам како да ме носи и поддржува целиот Божји народ. Ви благодариме на сите! И јас се молам за вас, а посебно се молам за мир. Овде, од болница, војната изгледа уште поапсурдна. Да молиме за измачената Украина, за Палестина, Израел, Либан, Мјанмар, Судан и Киву. Да се довериме на Марија, нашата Мајка“, заврши Светиот Отец.
Ватикан њуз/к.мк
