По враќањето во Апостолската нунцијатура, папата Лав XIV се сретна со претставници на главните провинцијали и на верските конгрегации во Камерун, охрабрувајќи ги посветените мажи и жени да живеат живот на целосна посветеност, во заедништво со епархиите во кои служат и во служба на оние на кои најмногу им е потребна помош.
Папата Лав XIV во петокот вечерта, 17 април 2026 година, се сретна со група од девет посветени верски лица, кои ја претставуваат Националната конференција на главни провинцијали, како и повеќе од 250 верски институти и конгрегации што делуваат во Камерун.
Според Канцеларијата за печат на Светиот Престол, Папата ги сослушал нивните зборови на благодарност за неговата посета на земјата и за обраќањата што ги одржа во изминатите денови, како и нивното сведоштво за посветеноста и служењето во многубројни ситуации на страдање во Камерун, особено меѓу младите, раселените лица, жртвите на насилство и жртвите на трговија со луѓе.
Провинцијалите зборувале и за потребата од поголема соработка со епископите и епархиските свештеници, како и за прашањата поврзани со верскиот идентитет што се јавуваат во нивните конгрегации.
Потоа папата Лав им се заблагодари за можноста што ја овозможила оваа средба, нагласувајќи дека „посветениот живот е суштински дел од животот на Црквата“.
Во продолжение, Светиот Отец се осврна на конкретниот однос меѓу посветениот живот, епископите и епархиското свештенство, потсетувајќи дека еден од заклучоците на последната Синода бил предлогот за формирање студиска група за обновување на документот Mutuae relationes. Во тој контекст, рече тој, од суштинско значење е да се препознаат и да се поттикнуваат различните харизми на конгрегациите присутни во секоја епархија.
Папата зборуваше и за формацијата во посветениот живот, истакнувајќи дека секоја конгрегација треба да остане верна на својата сопствена харизма. Тој ја нагласи потребата од заедничко расудување, за кандидатите да можат да бидат подготвени за живот на жртва, самопредавање и служење во заедницата.
Тој додаде дека одредени предизвици, меѓу кои соживотот меѓу луѓе од различни вери и религии, како и пасторалната грижа за младите, бараат продлабочено размислување во рамките на секој институт или заедница, во соработка со епархиите, за секоја харизма да може да се стави во служба на Црквата на секое ниво.
Осврнувајќи се на говорите што ги одржа за време на посетата, папата Лав рече: „Ги спомнавте обраќањата од овие денови. Папата дојде, Папата заминува, а вие ги имате зборовите што беа кажани“, повикувајќи ги присутните да ја прифатат пораката од посетата, да размислуваат за неа и да ја споделуваат, за да можат да одговорат на тешките предизвици на сегашниот миг.
Папата Лав XIV заврши со зборовите дека посветениот живот „бара храброст, понекогаш и радикална храброст, за без страв да се навестува она што Исус нè учи во Евангелието: ученици што одат до најсложените проблеми, до најоддалечените краишта на земјата, до најмалите, до затворениците, до оние на кои најмногу им се потребни надежта и Божјата љубов“.
На крајот од средбата, Папата им го подели својот благослов на присутните и заедно со нив ја измоли молитвата „Оче наш“, пред да ги поздрави поединечно.
Ватикан њуз/к.мк
https://www.vaticannews.va/en/pope/news/2026-04/pope-leo-xiv-cameroon-men-and-women-religious-superiors.html
