Папата Лав XIV испрати сочувство до кралот Хокон VIII и до народот на Норвешка по повод смртта на кралот Харалд V, истакнувајќи ја неговата повеќедецениска посветена служба на скандинавската нација.
Кралот Харалд V од Норвешка почина во петок во 6:35 часот наутро во Универзитетската болница во Осло, откако минатата недела беше примен во националната болница.
Харалд V владееше повеќе од 35 години, со што стана норвешкиот монарх со најдолго владеење по кралот Хокон VII.
Неговиот син, престолонаследникот Хокон, го наследи престолот како крал Хокон VIII.
Молитвите на Папата за вечен покој на покојниот крал
Неколку часа по смртта на монархот, папата Лав XIV испрати телеграма со сочувство до кралот Хокон VIII по повод смртта на неговиот татко.
Папата изрази тага поради веста за смртта на кралот Харалд и упати „искрено сочувство“ до новиот крал, до членовите на кралското семејство и до целиот народ на Норвешка.
„Свесен за неговата долгогодишна посветена служба на кралството, за која се надевам дека ќе продолжи да носи плодови“, рече папата Лав XIV, „ви го давам ветувањето за моите молитви за вечен покој на покојниот крал.“
На крајот, Светиот Отец упати Божји благослови на утеха и мир врз норвешкиот народ и врз сите што тагуваат поради оваа загуба.
Тој нè гледаше, нè познаваше и нè ценеше
Бискупот Ерик Варден од Трондхајм, апостолски администратор на Тромсе, исто така изрази сочувство, велејќи дека кралот Харалд V го направил преминот од телесна смрт во живот. „Со почит и благодарност го предаваме на Божјата милост“, рече тој.
Бискупот истакна дека кралот Харалд „ја воплотуваше нацијата“ на примерен начин.
„Бевме свесни дека тој нè гледаше, нè познаваше и нè ценеше“, рече тој. „Ја чувствувавме неговата грижа и бевме прегрнати од топлината со која зрачеше. Тој ни даде величествен пример на посветеност.“
Бискупот Варден нагласи дека Харалд „беше целосно наш крал, предан на својот народ. Не изгледаше дека какво било его стои на патот. Тоа го направи близок до нас на длабоко благотворен начин.“
На крајот, бискупот увери дека католиците во Норвешка се молат за покојниот крал, за кралското семејство и за новиот крал.
Ватикан њуз/к.мк
