Папата Лав XIV при посетата на седиштето на Светската програма за храна на Обединетите нации во Рим, во понеделник 22 јуни 2026 година, упати повик за поголема меѓународна солидарност во борбата против гладот. Тој истакна дека храната, водата и здравствената заштита се основни човекови права и не смеат да бидат подредени на политички или геополитички интереси.
Обраќајќи се пред Извршниот одбор на организацијата, Папата нагласи дека светот се соочува со сè посложени кризи кои не се повеќе привремени појави, туку долготрајни состојби. Војните, економската нестабилност, климатските промени и несигурноста во снабдувањето со храна создаваат услови во кои милиони луѓе живеат во постојана ранливост.
„Заедно ја делиме итната задача да се соочиме со гладот и неухранетоста, но и со причините што ги создаваат овие проблеми“, рече папата Лав XIV. Според него, не е доволно само да се реагира на кризите, туку потребно е да се разбере зошто тие постојано се повторуваат и кои структури ги одржуваат.
Криза во меѓународната соработка
Папата предупреди дека современиот меѓународен поредок станува сè пофрагментиран. Многу држави ги насочуваат своите ресурси кон националната безбедност и економските интереси, додека меѓународната соработка сè почесто се става во втор план.
Тој посочи дека денес светот располага со огромни производствени капацитети, но истовремено милиони луѓе немаат пристап до доволно храна. Овој парадокс, според него, покажува дека постои сериозна нерамнотежа меѓу глобалните можности и реалните приоритети.
Папата истакна дека хуманитарната помош често е оптоварена со сложени административни процедури кои ја забавуваат испораката на помошта до најзагрозените. Во исто време, пристапот до основни добра неретко зависи од политички и економски пресметки.
„Конфликтите се хранат полесно отколку луѓето“
Во своето обраќање, папата Лав XIV се осврна и на зборовите на неговиот претходник, папата Фрањо, кој често предупредуваше дека оружјето многу полесно стигнува до конфликтните подрачја отколку храната до гладните.
„Конфликтите се хранат полесно отколку што се хранат луѓето“, рече Папата, нагласувајќи дека ова претставува сериозен морален и политички проблем.
Според него, ваквата состојба покажува дека човечкото достоинство не секогаш е во центарот на меѓународните политики. Наместо тоа, интересите и стратегиските пресметки често добиваат предност пред потребите на најранливите.
Улогата на Светската програма за храна
Папата ја пофали работата на Светската програма за храна, истакнувајќи дека нејзината мисија е повеќе од техничка или административна задача. Таа претставува конкретен израз на меѓународната солидарност и грижа за луѓето кои се соочуваат со глад и сиромаштија.
Тој нагласи дека гладот не е само хуманитарен проблем. Неговите последици влијаат врз општествената стабилност, ја зголемуваат можноста за конфликти и придонесуваат за масовни миграции.
Поради тоа, Светиот Отец ги повика владите и меѓународните институции да ги зголемат ресурсите за борба против гладот и да ги отстранат пречките што ја попречуваат испораката на помошта.
На крајот, папата Лав XIV ја истакна важноста на соработката меѓу меѓународните организации, Црквата и граѓанското општество. Тој потсети дека безбедноста на храната е суштински дел од глобалната безбедност и предупреди дека во прашање не е само ефикасноста на една организација, туку и кредибилитетот на меѓународната соработка во целина.
Завршувајќи го своето обраќање, Папата се помоли сите луѓе да имаат пристап до својот секојдневен леб и можност да живеат достоинствен живот.
Ватикан њуз/к.мк
