Како што „не“ на првиот човек го затвори патот на човекот до Бог, така „да“ на Богородица го отвори патот до Бог за нас – рече папата Фрањо за време на пладневниот наговор до собраните верници на плоштадот Свети Петар на празникот Безгрешно зачнување на Пресвета Богородица.
Започнувајќи од денешните читања за празникот Безгрешното зачнување на Пресвета Богородица, Папата размислуваше за два клучни чекори во историјата, на односот помеѓу човекот и Бог кои нѐ водат до потеклото на настанок на злото и доброто: „не“ на првиот човек и „да“ на Богородица.
Книгата Битие – продолжи Светиот Отец – ни сведочи за првото човеково „не“ на Бог односно кога човекот се свртел од Бог кон себе, кога се одлучува за самозадоволност. Но напуштајќи го заедништвото со Бог човекот се изгубил самиот себе и започнал да се плаши, тој се сокрива и ги обвинува оние околу себе (1Мој 3, 10, 12). Тоа е грев. Но, Господ не го остава човекот на немилоста на неговото зло, веднаш го бара човекот и го прашува: „Каде си?“ Тоа е прашањето на татко или мајка кој го бара загубеното дете: „Каде си? Во која ситуација се најде?“ А Бог тоа го прави со многу трпение, се додека не го премости јазот кој се појави на почетокот – рече Папата.
Вториот клучен дел – смета папата Фрањо – е од денешното Евангелие каде гледаме како Бог доаѓа да живее меѓу нас, станува човек како нас и тоа преку големото „да“ на Марија. Исус своето патување не го започнал како возрасен и силен човек, туку целосно го следи патот на останатите луѓе: своите први месеци ги поминува во утробата на својата мајка Марија. Во сѐ ни беше еднаков освен во гревот. Затоа ја избира Марија единственото битие без грев, недопрена, која Евангелието ја нарекува „благодатна“, во неа нема место за гревот. И ние кога се присетуваме на неа ја препознаваме таа убавина, ја повикуваме неа „благодатна“ која е без сенката на гревот.
Папата истакна дека „да“ на Марија е целосно безусловно „да“. И како што „не“ на првиот човек го затвори патот до Бог, така „да“ на Марија ни го отвори патот до Бог. Понизното „да“ го надминува изворното „не“, „да“ на верата ја лекува непослушноста, „да“ на расположливоста ја руши себичноста на гревот.
И за секој од нас постои историја на спасението – рече Светиот Отец – историја која ја сочинуваат „да“ и „не“ на Бог. Но, понекогаш сме професионалци за делумно „да“: знаеме добро да глумиме дека не знаеме што Бог сака, што наложува совеста. Знаеме да бидеме лукави и на Бог наместо „не“ кажуваме: „Извини, но не можам,“ „не можам сека, туку утре,“ „ќе биде подобро утре, утре ќе се молам, утре ќе правам добро.“ Таквото лукавство нѐ оддалечува од „да“, од Бог, а нѐ приближува до „не“, „не“ на гревот“, „не“ на просечноста. Така пак ја затвораме вратата на доброто, а злото го искористува тоа „да“ со недостаток. Спротивно на тоа секое вистинско „да“ раѓа нова приказна, а од гревот остаруваме од внатре. Секое „да“ на Бог раѓа приказна на спасение за нас и за другите – рече Папата и наговорот го заврши со зборовите: За време на овој Божиќен пост Бог сака да го види и го исчекува нашето „да.“
После молитвата Ангел Господов папата Фрањо рече дека вчера силен земјотрес го погоди островот Суматра во Индонезија во кој смртно настрадаа повеќе од 100 луѓе. Истакна дека се моли за жртвите и за нивните семејства, за ранетите и за оние кои ги загубиле своите домови. Го помоли Господ на народот да му даде сила и да ги поддржи напорите на службите за спасување. Потоа ги поздрави присутните ходочасници дојдени од разни краишта на светот, а на крајот рече дека во попладневните часови ќе отиде на Шпанскиот плоштад ( Piazza di Spagna) за да се помоли пред статуата на Безгрешното зачнување.
РВ/к.мк
Не е дозволено преземање на оваа содржина или делови од неа за понатамошно користење во печатена, дигитална или било која друга форма на умножување без писмена дозвола од редакцијата на Католици.мк
