Католиците и православните обединети, за да одговорат на предизвиците во светот
Папата Фрањо и рускиот патријарх Кирил ја завршија историската средба во кубанската престолнина со повик за ставање крај на конфликтот и прогонството на христијаните на Блискиот Исток.
Повикот дојде преку заедничка декларација која двајцата поглавари ја потпишаа на крајот на двочасовниот меѓусебен разговор на аеродромот во Хавана, поставувајќи со тоа почеток на нова ера во односите меѓу Католичката и Руската православна црква. Во изјавата по состанокот зад затворени врати, во присуство само на нивните преведувачи и најблиските советници, папата Фрањо рече дека двајцата духовни лидери разговарале како епископи и „како браќа“, кои делат исто крштение.
Текстот на заедничката декларација потпишана во Хавана меѓу папата Фрањо и патријархот Кирил се состои од 5 страници, поделени во 30 точки.
Од срце во срце
„Со радост – истакнуваат папата Фрањо и патријархот Кирил – се сретнавме како браќа во христијанската вера, за да зборуваме лице в лице“(Иван 12, 2) и од срце во срце“. „Наоѓајќи се подалеку од Стариот свет со старите негови кавги, ја чувствуваме со посебна сила потребата од соработка помеѓу католиците и православните, кои сме повикани, со кротост и бојазност, да одговориме пред светот, за надежта која е во нас (1 Пет 3, 15)“.
Да одговориме заедно на предизвиците на модерниот свет
Текстот изразува жалење „за загубата на единството, како резултат на човечка слабост и грев“ и сфаќајќи ја „сериозноста на многуте пречки“ ние се надеваме дека оваа средба ќе помогне за обновување на единството, посакувано од Бог. Целта е да одговориме заедно на предизвиците на модерниот свет. Православните и католиците треба да се научат да даваат заедно сведоштво за вистината во областите каде што тоа е можно и неопходно“.
Да се стави крај на прогонствата врз христијаните и војни во Сирија и Ирак
„Нашиот поглед – посочуваат Фрањо и Кирил – е упатен особено кон регионите на светот, каде христијаните се жртви на прогон“, вистински сведоци на единството во страдање и мачеништво. „Во многу земји на Блискиот Исток и Северна Африка нашите браќа и сестри во Христа, се уништувани цели семејства, села и градови. Нивните цркви варварски се уништувани и ограбувани, светите предмети се осквернувани, нивните споменици се уништувани. Во Сирија, Ирак и други земји од Блискиот Исток, го забележуваме со тага егзодусот на христијаните и другите верски заедници. „Ја повикуваме меѓународната заедница да дејствува итно за да се спречи понатамошното иселување на христијаните од Блискиот Исток и да се стави крај на насилството и тероризмот“, исто така, да се обезбеди и „голема хуманитарна помош за населението кое страда, како и за бројните бегалци во соседните земји“. Тие повикаа исто така и на ослободување на киднапираните лица.
Суштинското значење на меѓурелигискиот дијалог
„Во оваа загрижувачка епоха – се вели во декларацијата – меѓурелигискиот дијалог е од суштинско значење и верските водачи имаат посебна одговорност да ги воспитуваат своите верници на почитување на другите вери: „Апсолутно неприфатливи се обидите да се оправдуваат криминални дејствија со верски слогани. Ниту едно злосторство не може да биде извршено во името на Бог“.
Верската слобода е под закана
Потоа, во документот се изразува загриженост „за ситуацијата во многу земји каде што христијаните сѐ почесто се соочуваат со ограничување на нивната верска слобода, правото да сведочат за нивните верувања и можноста да живеат според нив“. Се истакнува, дека транзицијата на некои земји во лаички општества, отуѓени од секоја врска со Бог и Неговата вистина, носи со себе сериозна закана за верската слобода. За нас извор на загриженост е постојното ограничување на правата на христијаните, како и директната нивна дискриминација кога некои политички сили, предводени од една често агресивнa идеологија, се обидуваат да ги оттргнат на периферијата на јавниот живот“. Во таа смисла, двајцата лидери повикуваат да бидеме внимателни против таква европска интеграција“, која не се однесува со почит кон религиозните идентитети“ и изразуваат уверување дека „Европа мора да остане верна на своите христијански корени“.
Солидарност со сиромашните и мигрантите
Во документот се повикува да не остануваме рамнодушни „кон судбината на милиони мигранти и бегалци кои чукаат на вратите на богатите земји. Незадржливиот консумизам кој се гледа во некои развиени земји, постепено ги исцрпува ресурсите на нашата планета. Растечката нееднаквост во распределбата на земните блага го зголемува чувството на неправда против системот во меѓународните односи“. „Христијанските цркви се повикани да ги бранат потребите за правда, почитувањето на традициите на народите и вистинска солидарност со сите кои страдаат“.
Семејство, живот, евтаназија
Потоа во документот се изразува загриженост во врска со кризата на семејството, засновано на бракот меѓу еден маж и една жена: „Ние жалиме што други форми на соживот се ставаат на исто ниво како традиционалното семејство, а концептот на татковство и мајчинство е отстранет од јавната свест“. Ги повикуваме сите да го почитуваат неотуѓивото право на живот. Милиони деца се лишени од можноста да бидат родени во светот. Гласот на крвта на неродените деца вика кон Бог (Битие 4: 10)“. Двајцата лидери изразуваат исто така и загриженост за развојот на евтаназијата и за асистираната репродукција“. Папата Фрањо и патријархот Кирил се обраќаат и кон младите христијани, да не се плашат да „тргнат против струјата, за да ја заштитат Божјата вистина.“
Мир во Украина
Декларацијата повикува за крај на насилството во Украина, што беше причина за „бројни жртви“ и „сериозна економска и хуманитарна криза“ во општеството. Се изразува исто и надеж дека „расколот меѓу православните верници во Украина може да биде надминат со помош на постоечките канонските норми“.
Браќа, а не ривали
„Ние не сме ривали, туку браќа – заклучуваат папата Фрањо и патријархот Кирил – и од овој концепт треба да се раководат сите наши заеднички дејства и активности кон надворешниот свет. Ги повикуваме католиците и православните од сите страни, да научат да живеат заедно во мир и љубов“.
РВ/В.Н.
