Папата Лав XIV ќе ја посети Ватиканската апостолска библиотека во понеделник, 14 септември, и ќе го отвори првото поглавје од изложбениот циклус „Катастрофа и чудо“, насловено „AQVA“.
Ватиканската апостолска библиотека соопшти дека Светиот Отец ќе ја посети Библиотеката во понеделник, 14 септември, во 11 часот, за да го отвори изложбениот циклус „AQVA. Катастрофа и чудо“.
Изложбата ќе биде отворена за посетители во одредени денови од неделата, од 25 септември до 14 мај 2027 година.
Повеќе детали за изложбата, која ја курираат заменик-префектот на Библиотеката, отец Џакомо Кардинали, Симона Де Крешенцо, Франческа Џането и Делио Провербио, ќе бидат објавени наскоро.
Дом каде минатото и иднината се среќаваат како пријатели
Изложбата ги обединува делата на три современи личности, францускиот уметник Џуниор Ариел, американскиот типограф Бил Моран и италијанскиот готвач Фулвио Пјеранџелини, во дијалог со збирките и просторите на Папската библиотека. Таа нуди размислување за водата како закана, но и како ресурс.
Секој од тројцата уметнички соработници ги реинтерпретира историските збирки на Библиотеката преку сопствената уметничка практика.
Архиварот и библиотекар на Светата Римска Црква, монсињор Џовани Чезаре Пагаци, изрази радост што ќе го пречека Светиот Отец. Тој истакна дека изложбата има за цел да поттикне дијалог меѓу современата уметност и вековното наследство на Библиотеката.
„Во неколку наврати“, потсети монсињор Пагаци, „Папата ја нагласи верноста кон минатото и верноста кон иднината. Сегашноста, вклучувајќи ја и сегашноста на оваа изложба, може да стане дом каде што минатото и иднината се среќаваат како пријатели.“
Древна институција што му припаѓа на Папата
Ватиканската апостолска библиотека е древна институција посветена на зачувување и истражување. Таа му припаѓа на Папата и е тесно поврзана со управувањето и службата на Светиот Престол.
Нејзините богати збирки опфаќаат ракописи, архивски материјали, печатени книги, стари и современи томови, монети и медали, графики и цртежи, како и картографски и фотографски материјали.
Овие збирки одамна им се достапни на квалификувани научници од целиот свет, без оглед на нивната раса, вера, потекло или култура.
Библиотеката е специјализирана пред сè за филолошки и историски дисциплини, а во поширока смисла и за теологија, право и науки.
Со историски врски со папскиот Scrinium, чие постоење е документирано уште од 4 век, Библиотеката ја започнала својата модерна историја со папата Никола V. Во средината на 15 век тој одлучил папските збирки книги да ги отвори за научниците.
Подоцна, папата Сикст IV ѝ дал постабилна организациска структура преку булата Ad decorem militantis Ecclesiae од 15 јуни 1475 година.
Ватикан њуз/к.мк
