Папата Фрањо испрати порака до Меѓународниот форум Католичка акција, кој се состана во текот на викендот и ги избра новите лидери на Форумот. Синодалниот дух треба да се вкорени во Црквата, пишува Светиот Отец, затоа мора да се движиме во иста насока како и луѓето кои чекорат заедно.
Папата Фрањо испрати порака до Меѓународниот форум Католичка акција најпрво поздравувајќи го новоизбраното раководство. Исто така, во неделата, на крајот од молитвата Ангел Господов на плоштадот Свети Петар ги поздрави сите членови, спомнувајќи го нивното собрание каде се собраа координаторите на Католичка акција од целиот свет.
Светиот Отец потсети дека нивното патување започнало пред повеќе од 30 години кога кардиналот Едуардо Пирони ја увидел потребата да се создаде Форум за да може Католичка акција да придонесе за предизвиците на новата евангелизација, комбинирајќи го богатството на секое место и култура. Папата потоа пишува дека многумина од нив решиле решително да ја следат таа интуиција и придонеле со своите способности и желба да го проповедаат Евангелието и покрај тешкотиите на тоа време, бидејќи во тоа време немало средства за комуникација и зближување меѓу земјите.
Тешки времиња и надежи
Набљудувајќи го денешниот свет, Папата забележува дека на некои места индивидуализмот оживеа и доведе до последици од насилство и економски кризи меѓу државите и народите, поткопувајќи ја надежта за универзално братство. Сепак, тешките времиња можат да бидат предизвикувачки, но тие можат да се преобразат во времиња на надеж, истакнува папата Фрањо, цитирајќи го кардиналот Пирони кој зборувал за важноста во животот да се биде знак. Но, не знак на празнина или смрт, туку знак на светлина што ја пренесува надежта. Папата потврди дека надежта е способна да ги надмине тешкотиите, несогласувањата, крстовите кои се појавуваат во секојдневниот живот.
Заедничко одење и дијалог
Истакнувајќи дека Црквата минува низ време кога синодалниот дух треба да се вкорене токму во начинот на кој треба да бидеме Црква, Папата напомена дека тоа значи дека одиме заедно во иста насока, што е она што Бог го очекува од Црквата од третиот милениум. Во овој дух, Римскиот бискуп ја покани Католичка акција да ги поттикне групите на католичка акција во различните локални Цркви. Истовремено, нагласува дека во духот на синодата е неопходно да научиме да се слушаме, повторно да ја научиме уметноста на дијалог со другите без пречки и предрасуди, на посебен начин дури и со оние кои се надвор, на работ, за да бидеме блиску до нив, што е Божји стил.
Слушајќи ги сите
Папата го повика новото раководство на Меѓународниот форум Католичка акција да бидат тие што слушаат, а не лидери на канцелариската маса, документите и разговорите преку онлајн апликацијата Zoom, да не паднат во искушение на институционален структурализам што е дизајниран и организирани врз основа на статути, прописи и наследени проекти. Понатаму изрази желба раководството на Форумот да ги слуша мажите, жените, постарите, младите и децата и да ги слушне нивните тивки крици. Ги повика да внимаваат за да не даваат одговори на прашања што никој не ги поставува или да зборуваат зборови што никој не сака да ги слушне. Накратко, Папата им предлага да слушаат – со отворени уши за вести и со самарјанско срце, а истовремено слушајќи ги знаците на времето.
Гласот на духот
Црквата не може да застане на работ на историјата, заплеткана во нејзините работи, потенцира Папата, затоа што е повикана да ги слуша и да ги види знаците на времето, за да ја претвори историјата, со нејзината сложеност и противречности, во историја на спасението. За Папата е важно Црквата да биде животно-пророчка која со свои знаци и гестови покажува дека има алтернативи за хармоничен соживот, меѓучовечки односи, работа, љубов, моќ и служење, и затоа е неопходно да се слуша гласот на Духот.
Во секое време, заклучува Светиот Отец, Духот нè отвора за својата новост, поучувајќи ја Црквата за важната потреба да се излегува, потребата за навестување и да не се затвора во себе. И додека световниот дух нè принудува да се фокусираме само на нашите сопствени проблеми и интереси, упорно бранејќи ги нашите сопствени определби и групи, Духот нè ослободува и нè повикува да чекориме по многу старите и секогаш нови патишта на сведочење, сиромаштво и послание, и да нѐ ослободи од нас самите и да нѐ испрати во светот, истакна папата Фрањо.
Следете го примерот на Марија
На крајот, Папата поттикна на активно слушање, кое дава ритам на сопствената работа и потребата Црквата да биде таа што дише мисионерски живот. Така направи Дева Марија додека слушаше, стана и појде да им служи на другите. Во пораката до членовите на Меѓународниот форум Католичка акција, Папата ги вети своите молитви за да можат ова време да го направат време на благодат, со храброст да слушаат, со ведрина на расудување и храброст да се навестува Евангелието со секојдневно сведочење.
Ватикан њуз/к.мк
