Папата Фрањо во своето пладневно обраќање пред молитвата Ангел Господов во недела 14 август 2022 година истакна дека во Евангелието од неделната Литургија Исус нè повикува повторно да го разгориме пламенот на верата што не ни дозволува да бегаме од предизвиците во животот, туку напротив, според Божјото Слово „разгорува немир што нè поттикнува да одиме“ и нè предизвикува да излеземе од индивидуализмот и да ја надминеме себичноста.
Осврнувајќи се на Евангелието од неделната Литургија во пладневното обраќање, папата Фрањо истакна дека еден израз на Исус секогаш нè импресионира и нè тера да размислуваме за тоа. Додека бил на пат со своите ученици, Исус вели: „Дојдов да фрлам оган на земјата и колку би сакал да се беше веќе разгорел“ ( Лука 12, 49). За каков оган зборува? И какво значење имаат тие зборови за нас денес, тој оган што го носи Исус? – праша Папата.
Како што знаеме, Исус дојде да го донесе на светот Евангелието, односно Радосната вест за Божјата љубов кон секој од нас. Затоа ни вели дека евангелието е како оган, бидејќи е порака која кога ќе влезе во историјата, ги согорува старите баланси на животот – рече Папата и продолжи: Нè става пред предизвик да излеземе од индивидуализмот, да ја победиме себичноста, да преминеме од ропството на гревот и смртта во новиот живот на воскреснатиот, воскреснатиот Исус.
„Евангелието, всушност, не ги остава работите такви какви што се; кога Евангелието се слуша и прифаќа, работите не остануваат такви какви што се. Евангелието предизвикува промени и повикува на преобраќање“.
Евангелието не дава лажен интимистички мир, туку поттикнува немир кој не принудува да тргнеме на пат, нè поттикнува да се отвориме кон Бога и нашите браќа – објасни Светиот Отец. Тоа е како оган: додека нè грее со Божјата љубов, сака да го потисне нашиот егоизам, да фрли светлина на темните страни на животот – кои сите ги имаме – да ги уништи лажните идоли кои нè прават робови.
Следејќи ги стапките на библиските пророци – да се потсетиме на Илија и Еремија – Исус гори со огнот на Божјата љубов и за да се распламти во светот, се дава себеси, сакајќи до крај, сѐ до смртта, и тоа смрт на крстот (сп. Филипјаните 2,8). Исполнет е со Светиот Дух, кој се споредува со оган, и со својата светлина и својата сила го открива милосрдното Божјо лице и им дава полнота на оние кои се сметаат за изгубени, ги урива бариерите на маргинализација, ги лекува раните на телото и душата, ја враќа религиозноста сведена на надворешни практики. Затоа е оган; менува, прочистува – истакна Папата.
Тогаш, што значат тие зборови на Исус за нас, за секој од нас – за мене, за вас, за тебе. Што значат за нас тие зборови на Исус за огнот? – праша Папата. Тој нè повикува повторно да го разгориме пламенот на верата, за да не стане секундарна реалност, или средство за индивидуална благосостојба, што нè тера да бегаме од предизвиците на животот и од обврските во Црквата и општеството. Имено – еден теолог вели: Верата во Бог „нè смирува, но не на начин на кој би сакале: односно да не ни обезбеди парализирачка илузија или блажено задоволство, туку да ни овозможи да дејствуваме“ (Sulle vie di Dio . Милано) 2008, 184).
„Верата, накратко, не е „приспивна песна“ што не заспива. Верата е оган, оган што гори за да не држи будни ноќе и работливи.“
Затоа, можеме да се запрашаме: дали сум страстен вљубеник на Евангелието? Дали често го читам Евангелието? Дали го носам со мене? Дали верата што ја исповедам и славам ме става во блажен спокој или го разгорува во мене огнот на сведоштвото? Можеме да се запрашаме и како Црква: дали гори огнот на Духот во нашите заедници, со голема љубов кон молитвата и милосрдието, радост на верата или, пак, се предаваме на уморот и навиката да не влече, со празнина на нашите лица и тага на нашите усни и секојдневно брборење?
Браќа и сестри, да се преиспитаме за овие прашања, за да можеме и ние да кажеме како Исус: Запалени сме од огнот на Божјата љубов и сакаме тој оган да го „фрлиме“ во светот, да го донесеме до сите, за секој поединец да може да ја открие нежноста на Отецот и да се искуси Исусовата радост, која го прави срцето широкоградно, а животот убав – ги поттикна Папата верниците и ги повика да се молат на Дева Марија; таа која примила оган од Светиот Дух да нѐ придружува со нејзиното застапништво.
Ватикан њуз/к.мк
