Шпанскиот печат дава позитивна прелиминарна оценка за еднонеделната посета на папата Лав XIV на земјата.
Главните дневни весници во Шпанија опширно ја следат посетата на папата Лав XIV. Празникот Телото Христово, на кој присуствуваа повеќе од 1,2 милиони верници, вечерната молитвена служба со младите, средбата на преполниот фудбалски стадион на Реал Мадрид и неговото обраќање пред парламентот досега беа во фокусот на известувањето.
Во вторник, поглаварот на Католичката црква отпатува од Мадрид за Барселона.
„Лав XIV се збогува со Мадрид со урнати ѕидови и обновени односи“, напиша најголемиот дневен весник во Каталонија, „Ла Вангардија“. Мадридски „Ел Паис“, пак, по обраќањето на Папата пред парламентот објави наслов: „Папско чудо во Конгресот: сите се согласуваат со Лав XIV“.
Иако главните весници нагласуваат различни аспекти од посетата, се создава јасна заедничка слика: Папата е препознаен како морален авторитет кој се залага за дијалог, единство и општествена одговорност во сè повеќе пополаризирано општество.
Конзервативните медиуми ги нагласуваат духовните аспекти
Додека конзервативните медиуми како „Ел Мундо“ и „АБЦ“ ја истакнуваат духовната димензија на посетата, лево-либералните весници повеќе ги нагласуваат општествено-политичките аспекти.
„Ел Паис“, на пример, ја гледа посетата на Папата пред сè како апел против растечката поларизација во Шпанија. Според тоа, во фокусот на нивното известување се изјавите на Папата за дијалогот, меѓусебното почитување и социјалната интеграција.
„Ел Мундо“ ја оценува посетата како значајна и во надворешнополитички контекст. Според весникот, изјавите на папата Лав покажуваат дека Ватикан и понатаму ја смета Шпанија за важен партнер во Европа.
„АБЦ“ ја опиша посетата како „историска“, нагласувајќи ја нејзината религиозна важност.
Весниците ги истакнуваат големите настани
Конзервативниот весник „Ла Разон“ особено се фокусираше на улогата на Црквата како општествено сидро. Весникот ги протолкува понекогаш самокритичните забелешки на Папата за Црквата како обид да се врати довербата и да се обезбеди нејзината долгорочна општествена релевантност.
Покрај политичките и религиозните аспекти, шпанските медиуми обемно известуваа и за големите настани со стотици илјади учесници, сеопфатните безбедносни мерки, исполнетост на хотелите и логистичките предизвици.
Во бројни извештаи и коментари, Мадрид беше опишан како град кој за неколку дена станал центар на католичкиот свет.
Капрес/к.мк
