Денес го славиме свети пророк Илија, родум од Тесвитија во Галад, област што се наоѓала на просторот на денешен Јордан. Тој служел во Северното царство Израил во 9 век пред Христос, во времето на царот Ахав.
И самото негово име е своевидна програма: Илија значи „мојот Бог е Јахве“. Тој бил голем и бестрашен борец за верата во единствениот Бог, која во тоа време била сериозно загрозена од паганските влијанија на царскиот двор.
Негов најголем противник била израилската царица Језавела, Феникијка која се омажила за царот Ахав и активно го ширела паганското почитување. Под влијание на Ахав и Језавела, народот почнал да се оддалечува од Господ и да им се поклонува на Ваал и Астарта.
Токму тогаш на сцената настапува Илија, како бестрашен сведок на единствениот вистински Бог. Језавела наредила да бидат погубени многу Господови пророци, а на царскиот двор дејствувале стотици свештеници на Ваал. Како пророк на Господ, Илија ги опоменувал царот и царицата поради нивните зли дела, поради што тие сакале да го отстранат.
На гората Кармил се случил познатиот настан во кој требало да се покаже кој е вистинскиот Бог: Господ или Ваал. Илија подготвил жртва на олтарот, а истото го направиле и свештениците на Ваал. Секој требало да го повика својот бог, а оној што ќе одговори со оган ќе биде признат како вистински Бог.
Господ ја услишил молитвата на Илија и испратил оган од небото, кој ја зафатил жртвата. Така народот видел дека Господ е вистинскиот Бог. По тој настан, според библискиот текст, лажните пророци на Ваал биле поразени, а Илија морал да бега во пустината.
Во пустината Бог се грижел за него и го хранел преку гаврани, кои му носеле храна. Илија останал верен на Господ до крајот. Откако го избрал пророкот Елисеј за свој наследник, бил земен на небото во огнена кола.
Светото Писмо раскажува многу настани поврзани со пророк Илија. Меѓу најпознатите е средбата со вдовицата од Сарепта и нејзиниот син. Преку Илија, Бог направил чудо: брашното и маслото во домот на сиромашната вдовица не се потрошиле, а подоцна пророкот, со Божја сила, го вратил во живот нејзиниот син.
Кај нашиот народ е познат и како Илија Громовник, бидејќи според народното верување грмотевиците потсетуваат на неговата огнена кола со која бил земен на небото.
Хкм/м.мк
