Перуанскиот претседател: Папата Лав XIV се очекува да посети пет градови во Перу во ноември
Претседателот на Перу, Хозе Марија Балказар, имаше речиси двочасовна приватна средба со папата Лав XIV во Ватикан на 18 јуни 2026 година.
Претседателот на Перу, Хозе Марија Балказар, изјави дека папата Лав XIV му дал „дозвола“ да им потврди на новинарите дека има намера да посети пет градови во земјата — Лима, Чиклајо, Пиура, Пукалпа и Куско — во првата половина на ноември.
„Ни потврди дека ќе биде во Перу во првата половина на ноември. Од Лима ќе замине во Чиклајо, од Чиклајо во Пиура, од Пиура во Пукалпа, во џунглата, а ќе го посети и Куско“, рече претседателот по приватната средба со папата Лав XIV во Ватикан.
Балказар истакна дека тимот задолжен за организација на папските патувања на крајот ќе ја утврди точната рута.
Тој не ја исклучи ниту можноста за посета на Арекипа. „Како што ќе одлучи Папата, според неговиот тим на кардинали и начинот на кој тој планира сè, можно е да биде и во Арекипа“, рече тој.
Перуанскиот претседател додаде дека на Папата му понудил неколку предлози. Меѓу нив е и можноста, по посетата на Чиклајо, Папата со хеликоптер да отпатува „во андската област Инкауаси и Кањарис, многу сиромашен регион каде што се зборува кечуански јазик, а кој тој многу добро го познава“.
„Му понудивме хеликоптер за брзо да стигне до секое место што ќе посака, бидејќи сака да опфати што е можно повеќе мали населени места на северот, како и во џунглата и во Куско“, изјави Балказар пред новинарите што го чекаа по аудиенцијата кај Светиот Отец.
Средба во пријателска атмосфера
Претседателот ја опиша средбата како „прекрасна и пријателска“ и нагласи дека за него особено значаен детал е тоа што е конгресмен од Ламбајеке, Чиклајо — градот во кој Папата живеел од 2015 до 2023 година.
„Се познаваме од претходно“, објасни Балказар, зборувајќи за причината поради која приватната аудиенција, одржана во Апостолската библиотека во Ватикан, траела „речиси два часа“.
Посетата на Балказар се совпадна со пребројувањето на гласовите од вториот круг на претседателските избори во Перу. Според претседателот, со Папата разговарале и за политичката состојба во земјата, особено за потребата транзицијата на власта по изборите да биде „што е можно поуредна, без поголеми конфликти, и поразениот да го признае победникот“.
Тој додаде дека Папата „е загрижен што сè уште сме во средината на ова пребројување“. Официјалното прогласување на победникот се очекува во средината на јули.
Разговори за енцикликата и миграцијата
За време на средбата било разговарано и за енцикликата Magnifica Humanitas, објавена на 25 мај, која се занимава со прашања како вештачката интелигенција и човековите права.
„Ја разгледавме целата негова енциклика, која, секако, ја прочитав, и од неа произлегува силен повик за општото добро“, рече Балказар.
Тема на разговор била и миграцијата. Според перуанскиот претседател, Папата е „свесен дека постојат криминалци кои мигрираат од една земја во друга“, но истовремено е „уште посвесен дека не треба да ги прогонуваме мигрантите што се движат од една земја во друга, бидејќи светот отсекогаш бил обележан со миграции, а на тие мигранти мора да им се даде право на живот“.
Балказар додаде дека, според Папата, човековите права не смеат да останат само „поетска декларација“, туку треба да се претворат во конкретни и објективни реалности.
По излегувањето од Апостолската палата околу 13 часот по римско време, претседателот замина во Ватиканските градини, каде што застана на молитва пред ликот на света Роза од Лима.
Ватикан ги истакнува добрите односи со Перу
Според Ватикан, на последователната средба со државниот секретар кардинал Пјетро Паролин и секретарот за односи со државите и меѓународните организации, надбискупот Пол Ричард Галагер, било изразено „задоволство“ од добрите односи меѓу Светиот Престол и Перу, како и желба тие дополнително да се зајакнат.
Разговарано било и за прашања од заеднички интерес, меѓу кои социо-економските состојби, нелегалното рударство, промоцијата на општото добро и дијалогот, како и напорите за поттикнување на социјалната кохезија.
Исто така, биле разменети мислења за регионалната и меѓународната социо-политичка состојба, со посебно внимание на миграцијата, организираниот криминал и последиците од конфликтите.
Сè уште се чека официјална потврда
На почетокот на јуни, Балказар изјави дека папата Лав XIV ќе го посети Перу на 10 ноември. Сепак, до патувањето остануваат уште неколку месеци, а Светиот Престол сè уште официјално не ја потврдил конечната програма на посетата.
ЕВТН/к.мк
